Cyfaddawd rhwng Ceidwadwyr San Steffan cyn pleidlais Brexit

Diweddarwyd am  
Llun pen ac ystwydd o Theresa May

Theresa May

Llun: Anika Haas trwy Commons Wikimedia CC2.0

Mae disgwyl y bydd Prif Weinidog Prydain, Theresa May, yn sicrhau cefnogaeth ei phlaid ei hun yn ystod y bleidlais ar y Mesur Ymadael yr wythnos hon.

Yn dilyn cyfarfod rhyngddi a’r Blaid Geidwadol neithiwr (nos Lun), fe ddaeth i’r amlwg bod rhai Aelodau Seneddol sydd o blaid ac yn erbyn Brexit wedi dod ynghyd i ffurfio cyfaddawd.

Roedd y cytundeb rhyngddyn nhw yn galw ar y Llywodraeth i geisio cytuno ar “drefniant” gyda’r Undeb Ewropeaidd ynglŷn â’r Undeb Tollau.

Mae’r cyfaddawd hwn wedi cael ei greu gan yr Aelodau Seneddol sydd o blaid aros yn yr Undeb Ewropeaidd, sef Sir Oliver Letwin a Nicky Morgan, ac maen nhw hefyd wedi ennill cefnogaeth Brexitwyr amlwg fel Jacob Rees-Mogg a Bill Cash.

Ond fe all y Llywodraeth wynebu colli o hyd, wrth i Dŷ’r Cyffredin bleidleisio ar y newidiadau eraill i’r mesur sydd wedi cael eu cynnig gan Dŷ’r Arglwyddi.

Galw am “undod”

Fe ddaeth y cyhoeddiad hwn yn fuan ar ôl i Theresa May gynnal cyfarfod â’r Pwyllgor 1922 neithiwr (dydd Llun, Mehefin 11), sy’n gyfrifol am Aelodau Seneddol meinciau cefn y Blaid Geidwadol.

Roedd wedi cynnal y cyfarfod er mwyn galw am “undod” o fewn y blaid ar drothwy’r bleidlais yr wythnos hon.

“Mae pwrpas yr Mesur Ymadael yn syml – y bwriad yw cyfreithloni deddfwriaeth yr Undeb Ewropeaidd a sicrhau symudiad llyfn a threfnus wrth inni adael,” meddai Theresa May yn y cyfarfod.

“Ond mae’r neges rydyn ni’n ei hanfon i’r wlad trwy ein pleidleisiau’r wythnos hon yn bwysig. Mae’n rhaid inni fod yn glir ein bod ni’n unedig fel plaid yn ein hymdrech i ddarparu ar benderfyniad pobol gwledydd Prydain.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed