Gwobr arbennig i Bradley Lowery gan y BBC

Diweddarwyd am  
Bradley Lowery

Bradley Lowery

Llun: www.bradleylowerysfight.org.uk

Fe fydd Bradley Lowery, y cefnogwr pêl-droed chwech oed fu farw o ganser eleni, yn cael ei enwi’n enillydd Gwobr Helen Rollason yng Ngwobrau Personoliaeth Chwaraeon y Flwyddyn y BBC eleni.

Bydd y seremoni’n cael ei chynnal yn Lerpwl heno a’i darlledu’n fyw gan y Gorfforaeth.

Bydd ei rieni, Gemma a Carl, yn derbyn y wobr er cof amdano.

Mae’r wobr yn dwyn enw’r cyflwynydd chwaraeon fu farw o ganser yn 1999.

Hanes Bradley

Cafodd Bradley ddiagnosis o fath prin o ganser – niwroblastoma – ac yntau’n 18 mis ar y pryd.

Yn ystod ei frwydr, fe ddaeth i amlygrwydd fel cefnogwr brwd o dîm pêl-droed Sunderland ac fel ffrind i’r chwaraewr Jermain Defoe.

Cafodd mwy na £700,000 ei godi y llynedd er mwyn iddo fynd i Efrog Newydd i dderbyn triniaeth, ond fe gafodd ei deulu wybod cyn iddyn nhw allu mynd bod ei ganser yn derfynol.

Yn dilyn ei farwolaeth, dywedodd Jermain Defoe mai Bradley oedd ei “ffrind gorau”.

Roedd Bradley wedi cael mynd i seremoni Personoliaeth Chwaraeon y Flwyddyn fel gwestai arbennig y llynedd, lle cafodd e’r cyfle i gwrdd â’r cyflwynydd Gary Lineker a rheolwr tîm pêl-droed Lloegr, Gareth Southgate.

Amlygrwydd

Yn ystod ei frwydr, cafodd nifer o ddigwyddiadau eu trefnu er mwyn tynnu sylw at ei salwch ac i godi arian.

Fe dderbyniodd e 250,000 o gardiau Nadolig y llynedd.

Enillodd Bradley wobr Gôl y Mis ar Match of the Day fis Rhagfyr y llynedd ar ôl cael gwahoddiad i fynd ar y cae cyn gêm Sunderland yn erbyn Chelsea a chael sgorio cic o’r smotyn.

Roedd yn fasgot tîm Everton y tymor diwethaf, wrth i’r clwb roddi £200,000 i Sefydliad Bradley Lowery, a thîm Lloegr ar gyfer gêm ragbrofol Cwpan y Byd yn erbyn Lithwania yn Wembley.

Cafodd ei enwi hefyd ar gerdyn y Grand National ym mis Ebrill.

 

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed