RSS

Golwg360

MwyCau 

Llafur yn “unedig” ac yn “ennill tir” drwy Brydain

Medi 27, 2017 13:52


Jeremy Corbyn, arweinydd Llafur, Llun: PA
Mae Llafur yn blaid “unedig” sy’n “ennill tir” trwy wledydd Prydain, yn ôl yr arweinydd Jeremy Corbyn.

Daeth ei sylwadau wrth iddo fe draddodi araith i gloi cynhadledd y blaid yn Brighton, flwyddyn yn unig ar ôl iddo fe frwydro i gadw ei swydd yn wyneb gwrthwynebiad o fewn y blaid.

Dywedodd Jeremy Corbyn fod y gynhadledd yn dangos “plaid unedig sy’n ennill tir ym mhob rhan o Brydain, gan ennyn hyder miliynau o’n cyd-ddinasyddion ac amlinellu ein syniadau a’n cynlluniau ar gyfer dyfodol ein gwlad ac ysbrydoli pobol o bob oed a chefndir”.

Addawodd y byddai Llywodraeth Lafur yn y dyfodol yn “gwneud newid drwy gydweithio a sefyll i fyny dros bawb”, gan gynnwys cau’r agendor cyflogau rhwng dynion a menywod, gan orfodi cwmnïau mawrion i gynnig yr un cyflog i’r ddau ryw.

Dywedodd fod y Llywodraeth Geidwadol yn dal ei gafael ar rym “gerfydd blaenau eu bysedd”, gan ddychanu slogan y blaid eu bod nhw’n “gryf a sefydlog”.

Roedd dyfodol y Gwasanaeth Iechyd, yr economi a newid hinsawdd ymhlith y pynciau eraill a gafodd sylw yn ei araith, ac fe ddywedodd y byddai “heddwch a chyfiawnder wrth wraidd ein polisi tramor”.

Brexit

Wrth grybwyll Brexit, dywedodd Jeremy Corbyn y byddai ei blaid yn magu perthynas “newydd ac adeiladol” ag Ewrop.

“Ry’n ni’n barod ac mae’n amlwg nad yw’r Torïaid yn barod.

“Dydyn nhw’n sicr ddim yn gryf ac yn bendant ddim yn sefydlog. Maen nhw’n dal wrthi gerfydd blaenau eu bysedd.”

Fe gyhuddodd e’r Llywodraeth Geidwadol o ddod o hyd i arian yn y “goeden hud” er mwyn sicrhau cefnogaeth y DUP i gynnal y llywodraeth.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.