Mae teyrngedau wedi’u rhoi i Dr Richard Edwards o Aberystwyth yn dilyn ei farwolaeth o ganlyniad i diwmor ar ei ymennydd.
Roedd yn drysorydd Parêd Gŵyl Dewi ac yn feddyg clwb pêl-droed y dref, yn aelod o’r clwb cinio lleol ac yn weithgar dros elusen Hosbis yn y Cartref Aberystwyth a’r Cylch.
Yn ôl teyrnged gan y clwb pêl-droed, roedd sgïo, chwarae golff ac yfed gwin coch ymhlith ei brif ddiddordebau.
Mae’n gadael gwraig, Dana, dau o blant, Dafydd a Fflur, a dau o wyrion bach newydd-anedig, Gruff a Briall.
‘Colled enfawr’
“Roedd ei golled yn enfawr i ni fel Pwyllgor,” meddai Siôn Jobbins, cadeirydd Parêd Gŵyl Dewi Aberystwyth.
“Roedd ei natur hamddenol, caredig a chall yn angor i ni.
“Yn ogystal ag edrych ar ôl ochr ariannol y Parêd, roedd hefyd yn gyfrifol am doreth o bethau eraill a oedd yn sicrhau bod y digwyddiad yn gweithio fel watch ar y dydd – trefnu’r llwyfan, codi’r gazeebo ar Sgwâr Glyndŵr, talu’r perfformwyr.
“Roedd y parch oedd i Richard o fewn i dref a bro Aberystwyth yn amlwg. Roedd PAWB yn ei barchu a hynny am ei fod e, fel y gŵr bonheddig yr oedd, yn parchu eraill.
“Mae colli Richard yn ergyd i’r Parêd, i dref Aberystwyth a bywyd Cymraeg y fro, ac i’r gwasanaeth iechyd.
“Coffa da am Dr Richard Edwards; bonheddwr, Cymro cadarn, dyn da a thyner.”
Roedd yn drist iawn gan holl deulu Parêd Gŵyl Dewi Aberystwyth glywed am farwolaeth Dr Richard Edwards, ein Trysorydd. Gŵr bonheddig, Cymro cadarn, dyn da a thyner. Mae ein teimladau dyfnion gyda Dana, Dafydd a Fflur a’r teulu. Bydd colled fawr ar ei ôl. https://t.co/MuZ5dYodSC pic.twitter.com/bKwKzMRQoT
— Parêd Gwyl Dewi Aber (@GwylDewiAber) April 3, 2020
‘Dolur calon’
Yn ôl Donald Kane, cadeirydd Clwb Pêl-droed Tref Aberystwyth, “dolur calon” oedd clywed am ei farwolaeth.
“Roedd yn ddyn bonheddig, ffrind a chefnogwr ffyddlon i’n clwb.
“Roedd chwaraewyr, swyddogion a rheolwyr y clwb yn gwerthfawrogi ei flynyddoedd o help a gwasanaeth fel Doctor.
“Roedd Richard yn un o’r bobol mwyaf ffeind a gwrddais yn fy myw ac mae e’n golled ofnadwy i ni.
“Cofiwn Dr. Edwards.”
Er Cof am Dr Richard Edwards/Dr Richard Edwards RIPhttps://t.co/q2TXIDhz1Z pic.twitter.com/zhmT4uN1un
— Aberystwyth Town FC (@AberystwythTown) April 3, 2020