Cau meysydd carafanau a mannau twristaidd yng Nghymru

Diweddarwyd  

Golygfa gyffredinol o barc carafanau

Llun: CC0

Mae’r Prif Weinidog Mark Drakeford wedi cyhoeddi mesurau newydd llym i arafu lledaeniad y coronafeirws yng Nghymru.

Fe fydd meysydd carafanau, gwersylloedd, mannau twristaidd a safleoedd poblogaidd gydag ymwelwyr yng Nghymru yn cau o heddiw (dydd Llun, Mawrth 23) ymlaen.

Daw’r cyhoeddiad wedi i filoedd o bobl heidio i fannau twristaidd fel Eryri a Pen-y-Fan ym Mannau Brycheiniog dros y penwythnos.

Mae awdurdodau lleol hefyd yn gorchymyn tafarndai ar draws Cymru i gau eu drysau yn dilyn adroddiadau bod rhai yn torri rheolau a ddaeth i rym ddydd Sadwrn (Mawrth 21). Fe allai tafarndai sy’n parhau i fasnachu wynebu colli eu trwydded.

“Mae Cymru yn wlad hardd,” meddai Mark Drakeford.

“Mae hi’n denu miliynau o ymwelwyr bob blwyddyn – ond nid nawr yw’r amser i wneud teithiau diangen. Rydym am i bobl ddod i Gymru unwaith fydd y coronafeirws wedi pasio.

“Heddiw, rydym yn cymryd camau i gau meysydd carafanau, gwersylloedd a rhai o’n lleoliadau ymwelwyr  mwyaf adnabyddus er mwyn cadw pobl yn saff a lleihau’r pwysau ar ein Gwasanaeth Iechyd.

“Mae fy neges yn syml. Arhoswch adref os gwelwch yn dda ac achub bywydau.”

Pobl ddim yn dilyn canllawiau

Daw’r cyhoeddiad yn dilyn gofidiau cynyddol nad oedd llawer o bobl yn dilyn canllawiau’r llywodraeth i leihau eu cysylltiad â phobl eraill.

Roedd tyrfaoedd mawr yn ymgynnull mewn rhai o ardaloedd awyr agored mwyaf poblogaidd Cymru dros y penwythnos.

Bydd pobl sydd yn gwersylla neu’n aros mewn carafán ar wyliau yn cael cais i fynd adref heddiw wrth i’r gwersylloedd a’r parciau gau, os nad oes rhesymau eithriadol fod yn rhaid iddyn nhw aros.

Ni fydd y mesurau newydd yma yn effeithio pobl sydd yn byw yn barhaol mewn carafán.

“Rydym yn croesawu’r cyhoeddiad yma,” meddai Emyr Williams, prif swyddog Parciau Cenedlaethol Cymru.

“Ar hyn o bryd mae’n hanfodol nad ydi pobl yn teithio yn ddiangen ac yn gorlwytho ein hardaloedd gwledig.

“ Yn dilyn y cyhoeddiad hwn byddwn yn cau pob mynediad i brif atyniadau fel Eryri, a gwn fod fy nghydweithwyr ym Mannau Brycheiniog a Pharc Cenedlaethol Arfordirol Sir Benfro yn cymryd camau tebyg, er enghraifft cau llwybrau i Ben-y-Fâl a Phen-y-Fan.

Cadw’n heini yn “agos at adref”

Yn ôl Frank Atherton, Prif Swyddog Meddygol Cymru mae’n bwysig fod pawb yn parhau i gadw’n heini, “ond plîs gwnewch hyn yn agos at adref,” meddai.

“Mae angen i ni wneud popeth y medrwn i gadw’r feirws rhag lledu, mae hynny’n golygu dim teithio os nad oes gwirioneddol raid ac osgoi cyswllt agos gyda phobl wrth aros dau fetr oddi wrth bobl.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn