“Nid yw rygbi Cymru ar werth” meddai Plaid Cymru

Diweddarwyd am  

Adam Price

Llun: Cynulliad Cenedlaethol Cymru CC 2.0

Mae Plaid Cymru wedi ysgrifennu at Lywodraeth San Steffan yn galw am sicrhau bod gemau rygbi  Pencampwriaeth y Chwe Gwlad yn cael eu cadw ar deledu’n rhad ac am ddim.

Cyhoeddodd arweinydd y blaid, Adam Price, eu bod wedi cysylltu â’r Ysgrifennydd Gwladol dros Ddiwylliant, y Cyfryngau a Chwaraeon, Sarah Healey, i gyfleu eu hanniddigrwydd am y posibilrwydd y gallai’r BBC ac ITV golli eu cytundebau i ddarlledu gemau’r Chwe Gwlad ar ôl eleni.

Fe fyddai hyn yn golygu bod yn rhaid i gefnogwyr dalu i’w gwylio ar sianeli eraill.

“Mae’n eironi chwerw wrth i ni ddathlu Dydd Gŵyl Dewi ein bod ni’n darganfod fod posibilrwydd y byddwn ni’n fuan iawn yn cael ein prisio allan o’n diwylliant ein hunain,” meddai Adam Price ar ei gyfrif Twitter.

Mae Plaid Cymru hefyd wedi cyhoeddi deiseb yn gofyn i bobl gefnogi “nad yw rygbi Cymru ar werth.” Mae’r ddeiseb wedi derbyn dros 2,000 o enwau hyd yn hyn.

“Sefyllfa drist”

Mae ymateb chwyrn wedi bod i’r adroddiadau ymhlith cefnogwyr rygbi.

“Yn anffodus ma’r byd chwaraeon yn newid gyda chwaraewyr, clybiau a gwledydd yn edrych am y ddêl orau yn ariannol,” meddai Emlyn Jones, cefnogwr rygbi brwd o Aberystwyth.

“Dw i’n talu tipyn o arian yn barod yn fisol am becynnau chwaraeon efo Sky a BT, a sai’n gweld llawer o wahaniaeth i’r gost i mi yn bersonol. Yn anffodus mae ‘na ganran uchel iawn o bobol sydd yn methu fforddio talu am becynnau lloeren ac yn ddibynnol ar y sianeli sydd am ddim.”

Ychwanegodd: “Mae cost tocyn gêm wedi codi yn echrydus. Mae rhai tocynnau am gêm Lloegr v Cymru penwythnos yma yn costi £145. Arian mawr am 80 munud! Mae’r BBC, ITV ac S4C  wedi rhoi blynyddoedd o raglenni o’r safon uchaf ond yn anffodus mae cwmniau mawr fel Sky yn gallu prynu eu ffordd i mewn i’r maes. Diwedd y gân yw’r geniog a gyda chwaraewyr, clybiau ac undebau yn gwario mwy, mae’n rhaid iddyn nhw fynd am y pris uchaf.

“Sefyllfa drist a bydd nifer uchel o bobol yn colli allan ar gael gwylio gemau rhyngwladol yn y dyfodol.”

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn