Llywodraeth Prydain am “aberthu sectorau pwysig iawn i Gymru”

Diweddarwyd  

Mae Llywodraeth Prydain yn barod i “aberthu sectorau sy’n bwysig iawn i economi Cymru”, yn ôl Jonathan Edwards, aelod seneddol Plaid Cymru.

Fe fu’n ymateb ar ôl i e-byst gan un o brif ymgynghorwyr Boris Johnson, prif weinidog Prydain, gael eu cyhoeddi i’r wasg.

Yn y negeseuon, mae Dr Tim Leung yn awgrymu nad yw’r sectorau amaeth a physgodfeydd yn “hanfodol bwysig” i economi Prydain.

Mae’n dweud y byddai’n bosib dilyn esiampl Singapôr, sydd heb ddiwydiant amaeth.

‘Diffyg ystyriaeth’

Wrth siarad â golwg360, dywed Jonathan Edwards fod y sylwadau’n dangos diffyg ystyriaeth o sefyllfa Cymru, lle mae’r sectorau ymhlith y pwysicaf i’r economi yma.

“Beth maen nhw wedi sylweddoli, wrth gwrs, yw er mwyn cyrraedd y freuddwyd ffals hyn o allu cael polisi masnach ryngwladol annibynnol, y sector domestig sydd yn sefyll yn y ffordd yw amaeth,” meddai.

“Dyna pham fod lot o’r storïau hyn yn dechrau dod ma’s.

“Ni’n gwybod o asesiadau Llywodraeth Prydain fod sector bwyd ac amaeth bedair gwaith yn fwy pwysig i economi Cymru na beth ydyn nhw i’r economi Brydeinig yn ei chyfanrwydd.

“Os y’ch chi’n lleihau safonau bwyd Prydain, fydd ffermwyr Cymru’n methu allforio mewn i’w marchnad fwya’ nhw, sef yr Undeb Ewropeaidd.

“Y gwir yw fod e’n fwy pwysig o lawer i economi Cymru nag yw e i economi Lloegr.

“Y sectorau maen nhw’n mynd i’w haberthu yw’r sectorau sy’n bwysig iawn i economi Cymru.”

‘Ofnau’

Yn ôl Jonathan Edwards, bydd y sectorau amaeth a physgodfeydd yn cael eu gwarchod llai wrth i Brydain baratoi i adael yr Undeb Ewropeaidd, a hynny wrth i Brydain ymddatod o gyfreithiau Ewropeaidd.

“Digwydd bod, o fewn y fframwaith Ewropeaidd roedd y sectorau hynny’n cael eu hamddiffyn yn gryf iawn.

“Roedd y bloc Ewropeaidd yn floc oedd yn ffafriol iawn i’r cynhyrchwyr bwyd.

“Fi’n ofni bod y dyddiau hynny’n mynd i brysur ddiflannu.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn