Y Gymraeg yn “ddymunol” eto gan Adra (Cartrefi Cymunedol Gwynedd)

Diweddarwyd am  

Mae’r gallu i siarad a chyfathrebu yn y Gymraeg yn “ddymunol” ar gyfer swydd ddiweddaraf Adra (Cartrefi Cymunedol Gwynedd gynt).

Mae’r cwmni’n hysbysebu swydd Rheolwr Datblygu Tir, gyda’r person a gaiff ei benodi’n “helpu i wireddu ein huchelgais i adeiladu cartrefi newydd i bobl yn ein cymunedau”.

Prif gyfrifoldebau’r swydd yw “datblygu cyfleoedd newydd i greu cartrefi, dod o hyd i safleoedd newydd a gweithio gyda phartneriaid i gyflwyno cynlluniau uchelgeisiol”.

Ymhellach, mae’r cwmni’n dweud eu bod yn “gweld ein hunain fel mwy na darparwyr tai”, a’u bod yn “credu mewn dull newydd, arloesol o ddarparu cartrefi newydd gan weithio gyda’n cwsmeriaid a meithrin ymdeimlad cymunedol cryf”.

“Anghenion y cwsmer yw’r flaenoriaeth bob tro,” meddai’r hysbyseb wedyn, gan ychwanegu eu bod yn “blaenoriaethu’r gymuned”.

Mae gofyn i’r sawl a fydd yn cael ei benodi i feddu ar “galon gymunedol”.

Helynt y dirprwy brif weithredwr

Dyma’r ail waith eleni i’r cwmni wneud y Gymraeg yn ddymunol ar gyfer un o’i swyddi.

Fis Ebrill eleni, roedd Adra yn hysbysebu ar gyfer dirprwy brif weithredwr newydd.

Ond fe arweiniodd gwneud y Gymraeg yn “ddymunol” at gyhuddiad eu bod yn torri eu cynllun iaith eu hunain.

Mae’r cynllun iaith hwnnw’n nodi mai “iaith weithredu fewnol CCG yw Cymraeg ac fe’i siaredir fel norm”, a bod cofnodion mewnol yn ddwyieithog.

Fe wnaethon nhw addo yn yr un cynllun fod unrhyw aelod o staff “yn gallu cyfathrebu yn effeithiol yn y Gymraeg a’r Saesneg hyd at safon sy’n briodol i ddibenion y swydd”.

Wrth amddiffyn y penderfyniad bryd hynny, dywedodd y cwmni bod eu gwaith yn “ehangu y tu hwnt i’r Fro Gymraeg”.

Mae Golwg360 wedi ceisio cael ymateb gan Adra.

 

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones