“Annibyniaeth x 3″ yw nod plaid newydd Gwlad

Diweddarwyd  

“Annibyniaeth, annibyniaeth, annibyniaeth” yw nod plaid Gwlad wrth sefyll yn yr etholiad cyffredinol, yn ôl Gwyn Wigley Evans, ei harweinydd.

Dyma’r tro cyntaf i’r blaid gymharol newydd sefyll mewn etholiad, a daw’r penderfyniad yn sgil bargen etholiadol rhwng Plaid Cymru, y Democratiaid Rhyddfrydol a’r Blaid Werdd i gefnogi ei gilydd fel pleidiau sy’n gwrthwynebu Brexit.

Dim ond yn y Cynulliad roedden nhw’n bwriadu sefyll, meddai Gwyn Wigley Evans, ond mae absenoldeb Plaid Cymru o’r papurau pleidleisio ym Mro Morgannwg; Brycheiniog a Maesyfed; Canol Caerdydd a Maldwyn yn cynnig cyfle.

“Tan ddoth y wybodaeth allan fod Plaid ddim yn sefyll mewn pedair sedd, oeddan ni ddim wedi planio, a dydi o ddim yn rhan o’n cynlluniau ni o gwbl, i sefyll i fynd i San Steffan,” meddai wrth golwg360.

“A ’dan ni wedi deud hynna’n gyhoeddus. Dim ond yn y Cynulliad [roedden nhw’n bwriadu sefyll].

“Ond gan bo [Plaid Cymru] ddim yn sefyll yn y pedair sedd yna, does ’na neb yn sefyll i gael pleidlais dros annibyniaeth, maen nhw i gyd yn unoliaethwyr.

“Rydan ni’n rhoi’r cyfle i bobol sydd eisiau dangos bo nhw dros annibyniaeth i Gymru i roi pleidlais fewn, a does ’na ddim cyfle fel arall.”

Yr etholaethau a’r ymgeiswyr

Hyd yn hyn, dim ond Siân Caiach (Canol Caerdydd) a Gwyn Wigley Evans (Maldwyn) sydd wedi cyflwyno’u henwau, a bydd cadarnhad erbyn 4 o’r gloch ddydd Iau (Tachwedd 14) pwy fydd yn sefyll ym Mro Morgannwg a Brycheiniog a Maesyfed.

Yn sgil ymddiswyddiad Alun Cairns, Ysgrifennydd Cymru, mae’n debygol y bydd cryn sylw yn ystod yr ymgyrch i etholaeth Bro Morgannwg, lle mae’n sefyll fel ymgeisydd Ceidwadol eto.

Ac yn ôl Gwyn Wigley Evans, mae hynny’n cynnig cyfle da i Gwlad.

“Bydd yna lot o gyhoeddusrwydd, a bydd hynny’n beth da iawn i ni. Mae’n hollbwysig fod pobol yn sefyll ac yn cael y cyfle i sefyll dros Gymru yn lle… ydewis fasa, yn Sir Drefaldwyn, y Ceidwadwyr neu’r Democratiaid Rhyddfrydol a Llafur.

“Maen nhw i gyd yn edrych tuag at Lundain.”

Pwy yw Gwlad?

Yn ôl Gwyn Wigley Evans, mae aelodau Gwlad wedi bod yn aelodau Plaid Cymru yn y gorffennol. Ond yn wahanol i’r blaid honno, maen nhw’n canolbwyntio ar fater annibyniaeth ac unrhyw bolisïau cysylltiedig ac mae’r arweinydd yn cydnabod y gallai’r blaid gael ei gweld fel ‘plaid un polisi’.

“Mae ’na elfen o wir yn hynna,” meddai. “Tri phwynt sydd gynnon ni – annibyniaeth, annibyniaeth, annibyniaeth.

“Sut rydan ni’n ei wneud o a sut bolisïau, sy’n gwestiwn gwahanol. Ond dydan ni ddim ond yn edrych ar annibyniaeth a Chymru. Dyna’r rheswm i ni fod mewn bodolaeth. Y diwrnod mae Cymru’n cael annibyniaeth, does yna ddim angen Gwlad.

“Rydan ni i gyd wedi bod yn rhan o Blaid Cymru ar ryw adeg neu’i gilydd, a doedd annibyniaeth ddim yn enw oedd yn cael ei ddefnyddio pan oedd Dafydd Wigley yn rhedeg Plaid Cymru.”

 Mwy o alw am annibyniaeth

Yn ôl Gwyn Wigley Evans, mae gan y blaid gyfle i adeiladu yn yr etholiad hwn ar y gwaith sydd wedi’i wneud gan fudiadau annibyniaeth fel Yes Cymru.

“Mae’r tyfiant wedi bod yn gryf iawn. Mae mudiadau fel Yes Cymru ac yn y blaen yn cael lot o sylw, lot o aelodau ac mae [gorymdeithiau] Merthyr, Caerdydd a Chaernarfon wedi dangos bod ’na lot o bobol yn fodlon dod allan. Mae yna gyffro.”

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones