Enw uniaith i’r Senedd, meddai llythyr Cymry amlwg

Diweddarwyd  

Michael Sheen yn gwisgo crys-t Catalwnia cwmni Cowbois

Llun: Cowbois

Mae grŵp o Gymry amlwg, sy’n cynnwys yr actor Michael Sheen a’r cerddor Cerys Matthews, wedi cyhoeddi llythyr agored yn galw ar wleidyddion i gefnogi enw uniaith Gymraeg i’r Senedd mewn pleidlais yr wythnos nesaf.

Daw cyhoeddiad y llythyr cyn rali a gynhelir gan ymgyrchwyr yfory (dydd Sadwrn, Tachwedd 9) o blaid defnyddio’r enw ‘Senedd’ yn unig. Er bod cefnogaeth drawsbleidiol i gadw at un enw Cymraeg ar gyfer y ddeddfwrfa genedlaethol, mae’r Gweinidog Jeremy Miles wedi penderfynu chwipio holl Weinidogion Llywodraeth Cymru yn erbyn enw uniaith Gymraeg.

Mae dros 30 o bobol wedi llofnodi’r llythyr, yn cynnwys y dyfarnwr rygbi Nigel Owens; y DJ Huw Stephens; y bardd Gwyneth Lewis; a’r digrifwr, Tudur Owen.

Y llythyr

“Ar un adeg yn hanes Cymru, gwnaed ymdrech benodol a bwriadol drwy’r gyfraith a gan yr awdurdodau i waredu popeth Cymraeg o bob rhan o fywyd cyhoeddus – o addysg a’r llysoedd i weinyddiaeth gyhoeddus ac enwau lleoedd. Bellach, mae consensws eang bod ein hiaith unigryw yn rhywbeth i’w thrysori a’i hawlio fel rhan o’n dyfodol.

“Mae enwi’r Senedd, ein deddfwrfa genedlaethol, yn arwyddocaol felly fel datganiad o’r hyn rydyn ni eisiau ei weld ar gyfer y cenedlaethau i ddod. Bydd rhoi enw uniaith Gymraeg ar ein sefydliad cenedlaethol pwysicaf yn anfon neges o bwys o ran y statws canolog ac arbennig rydym yn dymuno i’r iaith ei hawlio ym mywyd cyhoeddus y wlad. Mae hwn yn gyfle i ddangos bod y Gymraeg wir yn perthyn i bawb, ac yn cynnwys pawb o bob cefndir.

“Mae ‘Senedd’ yn cael ei ddefnyddio’n helaeth gan y rhan fwyaf o bobl eisoes, yn Gymraeg ac yn Saesneg. Mae hynny’n gwbl naturiol gan ei fod yn adlewyrchu profiadau pawb sy’n byw yng Nghymru lle mae’r iaith yn gweu’n naturiol i’w bywydau beunyddiol – o enwau trefi a phentrefi sydd ag enwau uniaith Gymraeg i eiriau’r anthem genedlaethol.

“Gofynnwn felly i chi gefnogi’r enw uniaith Gymraeg ‘Senedd’ yn y bleidlais ar 13 Tachwedd, fel rhywbeth unigryw Gymreig i’w ddathlu ac i’w fwynhau gan bob un ohonom.”

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones