Eiris Llywelyn yn dal ei thir tros gosb trwydded deledu

Diweddarwyd am  

Llun: CC0

Mae Eiris Llywelyn yn dweud ei bod hi’n mynd i barhau i wrthod talu dirwy a gafodd am ei rhan yn yr ymgyrch i sicrhau pwerau darlledu i Gymru, er gwaethaf ymweliad gan feilïaid ychydig wythnosau yn ôl.

Ym mis Ebrill, cafodd y wraig 68 oed o Ffostrasol ei dyfarnu’n euog yn Llys Ynadon Aberystwyth o wrthod talu ei ffi drwydded deledu, cyn cael ei gorchymyn i dalu £220 mewn costau.

Yn ôl Cymdeithas yr Iaith, hi oedd y trydydd unigolyn i fynd o flaen eu gwell am wrthod talu’r ffi drwydded deledu fel rhan o’r ymgyrch i ddatganoli pwerau darlledu i Gymru, ond y cyntaf i ddatgan nad yw’n mynd i dalu’r gosb ariannol ac felly wynebu carchar.

“Dw i’n fodlon mynd â’r brotest i’r pen”

“Dw i’n bwriadu parhau i beidio â thalu a dw i’n fodlon wynebu’r canlyniadau,” meddai Eiris Llywelyn, sy’n wraig i’r ymgyrchydd, Emyr Llywelyn, a gafodd ei garcharu yn yr 1960au am ei ran yn yr ymgyrch yn erbyn boddi Cwm Tryweryn.

“Mae’r beilïaid wedi galw ac yn bwriadu cymryd fy eiddo y tro nesa’ ond dw i ddim yn mynd i adael iddyn nhw ddod i mewn i’r tŷ. Dw i’n fodlon mynd â’r brotest i’r pen er mwyn tynnu sylw at fater sydd o bwys aruthrol i’n cenedl.

“Byddai datganoli’r pwerau cyfathrebu a darlledu hyn er lles democratiaeth Cymru, yn ogystal â’r Gymraeg. Mae diffyg cynnwys Cymreig a Chymraeg ar y cyfryngau yn bygwth parhad hunanlywodraeth yng Nghymru, ac mae’n rhaid mynd i’r afael â’r mater.”

Safiad dros ddemocratiaeth

Yn ôl Cymdeithas yr Iaith, sy’n gyfrifol am yr ymgyrch datganoli pwerau darlledu, mae safiad Eiris Llywelyn yn “frwydr dros ddyfodol ein hiaith a’n cymunedau a dros ddemocratiaeth.”

“Mae democratiaeth yn amhosib os na fydd rheolaeth dros ddarlledu yng Nghymru yn symud o Lundain i Gaerdydd a’r cyfryngau yn adlewyrchu ein gwerthoedd a’n diwylliant ni a’n bod ni’n gweld y byd drwy ffenestr Gymreig,” meddai Heledd Gwyndaf ar yr ymgyrchwyr iaith.

“Mae datganoli’r system ddarlledu yr un mor bwysig â datganoli grym gwleidyddol.”

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer