Guto Bebb yn cefnogi ffermwyr sy’n galw am ail refferendwm Brexit

Diweddarwyd  
Llun pen ac ysgwydd o Guto Bebb

Guto Bebb

Llun: Portead swyddogol Ty’r Cyffredin CCA 3.0

Mae Aelod Seneddol Aberconwy, Guto Bebb, ymhlith y siaradwyr mewn digwyddiad yn Llundain yr wythnos hon a gafodd ei drefnu gan grŵp o ffermwyr sy’n galw am ail refferendwm Brexit.

Fe gafodd praidd o ddefaid eu gyrru ar hyd strydoedd Whitehall ddoe (dydd Iau, Awst 15) ar drothwy’r cyfarfod yn y Farmers’ Club yn 3 Whitehall Court.

Yn gyfrifol am y stynt cyhoeddusrwydd oedd y Farmers for a People’s Vote, sy’n rhybuddio y gallai hanner o fusnesau ffermio fynd i’r wal os bydd gwledydd Prydain yn gadael yr Undeb Ewropeaidd heb gytundeb.

Ffermwyr wedi cael eu twyllo

Yn ôl Guto Bebb, fe fyddai bwrw ymlaen â Brexit dim cytundeb, a hynny heb sêl bendith y cyhoedd,  yn “sarhad ar ein democratiaeth”.

“Mi rydw i’n cynrychioli llawer o ffermwyr yn fy etholaeth,” meddai. “Wnaethon nhw ddim pleidleisio o blaid rhoi eu hunain allan o fusnes, gan beryglu eu bywoliaeth.

“Fe bleidleisiodd llawer ohonyn nhw o blaid gadael yr Undeb Ewropeaidd oherwydd bod pobol fel Boris Johnson wedi dweud wrthyn nhw y byddai’n golygu perthynas well o ran masnachu gyda’r Undeb Ewropeaidd, yn ogystal â dyfodol gwell.

“Mae’r realiti i’w weld yn wahanol iawn nawr.”

Brexit heb gytundeb – “gwallgofrwydd”

Yn ôl adroddiad a gafodd ei gyhoeddi yn ystod y cyfarfod gan Dr Sean Rickard, cyn-brif economegydd yr NFU, mae’r diwydiant amaeth a bwyd am fod “yn agored i niwed” os bydd Brexit dim cytundeb.

Mae’n nodi bod yna beryg i ffermydd gwledydd Prydain droi’n “anghystadleuol” wrth i’r Undeb Ewropeaidd, a gwledydd eraill y mae’r Deyrnas Gyfunol yn masnachu’n ddi-doll â nhw, gyflwyno tollau ar allforion.

Fe allai colli’r system bresennol o gymorthdaliadau, yn ogystal â marchnad fwy cystadleuol, ddod â hanner y busnesau fferm yng ngwledydd Prydain i ben erbyn canol yr 2020au, meddai’r adroddiad wedyn.

“Mae llawer o ddiwydiannau yn mynd i ddioddef, ond y diwydiant a fydd yn dioddef o’r sioc economaidd mwyaf difrifol fydd amaethyddiaeth,” ychwanega Dr Sean Rickard.

Mae arolwg barn yng nghylchgrawn y Farmers Weekly yr wythnos hon yn nodi bod 53% o’i ddarllenwyr yn credu bod Brexit yn mynd i gael effaith negatif ar eu busnes. Mae 21% wedyn yn credu i’r gwrthwyneb, tra bo 26% yn ‘niwtral’.

Cefn Gwlad

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer