Cwmni theatr am greu cartref newydd gwerth £3.2m yn ninas Bangor

Diweddarwyd am  
Eglwys Santes Fair, Bangor

Eglwys Santes Fair, Bangor

Llun Cwmni’r Frân Wen

Mae cwmni theatr ar gyfer pobol ifanc wedi cyhoeddi cynlluniau ar gyfer creu “hwb creadigol pwrpasol” gwerth £3.2m ynghanol dinas Bangor.

Yn ôl rheolwyr Cwmni’r Frân Wen, y bwriad yw trawsnewid hen Eglwys Santes Fair “yn hwb i artistiaid ifanc a newydd yng ngogledd Cymru”.

Enw’r ganolfan newydd ar Ffordd Garth fydd ‘Nyth’, a bydd yn cynnwys “gofodau ar gyfer ymarferion, gweithdai a pherfformiadau ar raddfa fechan ar gyfer amrywiaeth o brosiectau creadigol.”

Yn sgil prynu’r lle, mae’r cwmni yn rhagweld y bydd y “cam datblygol” yn parhau am 12 mis, cyn y bydd amserlen bellach yn cael ei ryddhau.

Mae cynlluniau ar gyfer y cartref newydd wedi cael eu datblygu gyda phobol ifanc o bob rhan o ogledd-orllewin Cymru, ac mae wedi derbyn cefnogaeth gan wahanol gyrff cyhoeddus, gan gynnwys Cyngor Celfyddydau Cymru.

Gwneud y celfyddydau yn “fwy hygyrch a pherthnasol”

Cafodd Cwmni’r Frân Wen ei sefydlu yn 1984, ac mae’n canolbwyntio ar ddarparu rhaglen o gynyrchiadau theatr drwy gyfrwng y Gymraeg ar gyfer pobol ifanc yng ngogledd Cymru a thu hwnt.

Ar hyn o bryd, mae pencadlys y cwmni wedi ei leoli ym Mhorthaethwy.

Yn ôl Irfon Jones, cadeirydd bwrdd annibynnol Cwmni’r Frân Wen, mae am i’r celfyddydau fod yn “fwy hygyrch a pherthnasol” ar gyfer pobol ifanc.

“Mae cysyniad Nyth yn seiliedig ar gydweithio a bydd yn galluogi Frân Wen i ffynnu’n artistig a datblygu partneriaethau newydd er mwyn hyrwyddo grym trawsnewidiol y celfyddydau mewn meysydd yn cynnwys iechyd a lles a dysgu creadigol,” meddai.

“Mae’r celfyddydau yn rhan hanfodol o gyfansoddiad a bywiogrwydd ein cymunedau ac ar adeg pan fo gofodau a chyfleoedd i bobol ifanc yn arbennig yn brin, rydym am greu hafan ddiogel i’w meithrin a’u cefnogi ar amser mor allweddol yn eu bywydau.”

Ychwanega Nia Jones, y Cyfarwyddwr Gweithredol, y bydd Nyth yn caniatáu’r cwmni i ddal ati i “gyflwyno gweithgareddau celfyddydol o ansawdd uchel i ysbrydoli’r genhedlaeth nesaf o bobol ifanc greadigol a mentrus.”

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer