UKIP Cymru “mewn shambyls” ar ôl i Michelle Brown fynd

Diweddarwyd  

Michelle Brown AC

Llun: Cynulliad Cenedlaethol Cymru CC 2.0

Mae UKIP Cymru mewn “shambyls” yn dilyn ymadawiad Michelle Brown o grŵp y blaid yn y Cynulliad, yn ôl y Democratiaid Rhyddfrydol Cymreig.

Yr aelod tros Ogledd Cymru yw’r pedwerydd Aelod Cynulliad i adael y grŵp ers etholiadau’r Cynulliad yn 2016, pan gafodd saith aelod UKIP eu hethol.

Mae’n dilyn Caroline Jones, Mark Reckless a Nathan Gill – sydd hefyd wedi gadael UKIP Cymru yn ystod y tair blynedd diwethaf.

Bydd Michelle Brown bellach yn eistedd fel aelod Annibynnol yn y Cynulliad.

Gadael y grŵp – y rhesymau

Mewn datganiad, mae Michelle Brown yn dweud ei bod hi’n ofni bod synnwyr cyffredin yn pylu o fewn i’r blaid ar ôl i Neil Hamilton rannu llwyfan yn ddiweddar â Tommy Robinson, sy’n ymgynghorydd i’r blaid ers y llynedd.

Dywed ei bod hi’n anhapus ag e-bost a gafodd ei anfon gan Gerrard Batten, arweinydd UKIP, yn nodi y bydd Tommy Robinson nid yn unig yn siarad mewn rali sydd wedi ei drefnu gan y blaid, ond yn ei noddi hefyd.

“Mae’n glir bod angen i wledydd Prydain faeddu eithafiaeth a ffwndamentaliaeth yn eu holl ffurf a’u hamrywiaeth,” meddai Michelle Brown.

“Ond dw i’n ofni bod arweinyddiaeth bresennol UKIP yn credu mai’r ffordd orau o wneud hyn yw i fagu a meithrin ffwndamentaliaeth arall.”

Mae Michelle Brown hefyd wedi beirniadu’r “diffyg democratiaeth a chyfathrebu” o fewn grŵp y blaid yn y Cynulliad, gan ddweud na wnaeth Gareth Bennet, yr arweinydd, “ddim ymdrech” i atal Caroline Jones rhag gadael.

Roedd yn “allweddol” yn cadw Mandy Jones, sy’n eistedd fel Aelod Cynulliad Annibynnol, allan ohono hefyd, meddai Michelle Brown ymhellach.

“Difaterwch”

Yn ôl arweinydd y Democratiaid Rhyddfrydol Cymreig, Jane Dodds, mae’r ymddiswyddiad diweddaraf yn adlewyrchu cyflwr UKIP Cymru ar hyn o bryd, gyda cholli pedwar Aelod Cynulliad yn “edrych fel difaterwch”.

“Mae UKIP o hyd wedi bod yn blaid eithafol,” meddai Jane Dodds. “Ond yn ystod y misoedd diwethaf, mae UKIP wedi dod yn fwy eithafol, drwy ddiffinio eu hunain gyda gwrth-Islamiaeth noeth a chysylltu eu hunain gyda ffasgwyr brwnt fel Tommy Robinson.

“Mae’n dweud llawer pan mae’r blaid wedi dod yn rhy eithafol i bawb heblaw am ffieiddiwr fel Neil Hamilton a phobol gwrth-drans fel Gareth Bennet.

“Rydyn ni’n llwyr ymwrthod â chasineb UKIP Cymru ac yn hyderus y bydd pobol Cymru yn gwneud yr un peth yn 2021.”

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Perthynas gymhleth Cymru a Lerpwl