Dyfodol Ysgol y Gymraeg, Prifysgol Caerdydd, yn y fantol

Diweddarwyd am  
Hen adeilad y Brifysgol

Prifysgol Caerdydd

(Llun CC Parth Cyhoeddus)

Mae ymgyrchwyr iaith wedi mynegi eu pryder ynglyn â chynlluniau Prifysgol Caerdydd i uno Ysgol y Gymraeg gydag adrannau ieithoedd eraill.

Yn ôl papur at staff, mae gan y brifysgol gynlluniau hefyd i dorri 380 o swyddi.

Ond y syniad o gael gwared â statws ‘Ysgol’ ar yr adran fwyaf o blith holl adrannau Cymraeg prifysgolion Cymru, sydd wedi codi gwrychyn.

Mae’r papur yn datgan bod Prifysgol Caerdydd yn “edrych ar gyfuno’r Ysgolion Saesneg, Cyfathrebu ac Athroniaeth, Ieithoedd Modern a’r Gymraeg yn Ysgol Llenyddiaeth, Ieithoedd ac Ymarfer Creadigol newydd”.

Y bwriad yw “galluogi arbedion effeithlonrwydd o ran addysgu a’u cyflwyno”.

Ac mae’n ymddangos y gallai pwnc ‘Cymraeg i Oedolion’ gael ei ddileu yn llwyr fel rhan o’r newidiadau.

“Byddwn yn ystyried ai ni yw’r sefydliad priodol i ddarparu Cymraeg i Oedolion, ac yn gweithio gyda phartneriaid i wneud yn siŵr bod cyrsiau yn parhau,” meddai’r papur.

“Byddwn yn gweithio gyda’r disgyblaethau er mwyn llunio maint yr Ysgol newydd o ran nifer y staff academaidd, ac rydym yn rhagweld y bydd yr aildrefnu yn galluogi staff i addysgu ar draws ystod o feysydd.”

Ergyd i darged y miliwn

Byddai israddio Ysgol y Gymraeg yn ergyd enfawr i Ysgol y Gymraeg meddai Mabli Siriol o Gymdeithas yr Iaith Gymraeg, “nid yn unig i’r Brifysgol fel sefydliad ond hefyd i ymdrech Llywodraeth Cymru i gyrraedd miliwn o siaradwyr Cymraeg”.

“Heb statws Ysgol annibynnol, mae’n anochel y bydd yr adnoddau ar gyfer y Gymraeg yn lleihau a bydd safonau i fyfyrwyr yn disgyn.

“Ychydig flynyddoedd wedi iddyn nhw ail-ennill cytundeb i gynnig y gwasanaeth Cymraeg i Oedolion, mae’n sioc eu bod nhw nawr yn sôn am ddiddymu’r gwasanaeth, un sydd mor bwysig i’r iaith.”

Ymateb Prifysgol Caerdydd

Yn ôl Prifysgol Caerdydd, un syniad ymysg nifer yw cael gwared ag Ysgol y Gymraeg.

Os bydd y syniad yn cael ei fabwysiadu byddai’n galluogi Ysgol y Gymraeg “i elwa ar fod yn rhan o grŵp ehangach o ddisgyblaethau sy’n rhannu nifer sylweddol o fuddiannau” meddai llefarydd ar ran Prifysgol Caerdydd.

“Gobeithiwn wella ymchwil ac addysgu drwy gynnig mwy o gyfleoedd ar gyfer cydweithio rhyngddisgyblaethol.

“Mae’r Brifysgol wedi ymrwymo i gynyddu nifer y myfyrwyr sy’n astudio’r Gymraeg ac i gyflawni targedau Y Ffordd Ymlaen 2018-2023, sy’n edrych i ddatblygu Cymraeg yn y Brifysgol.

Bydd ymgynghoriad yn cael ei gynnal ar y newidiadau.

Addysg

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Perthynas gymhleth Cymru a Lerpwl