Teyrngedau i gyn-is hyfforddwr Cymru, Eric Harrison

 
Crys coch, a logo'r Gymdeithas Bel-droed ar y frest

Llun: Cymdeithas Bêl-droed Cymru

Mae ffigyrau amlwg yn y byd pêl-droed wedi bod yn rhoi teyrngedau i gyn-hyfforddwr tîm ieuenctid Manchester United a chyn-is hyfforddwr Cymru, Eric Harrison, a fu farw yn 81 oed.

Cafodd y gŵr a oedd yn hanu o Orllewin Efrog ei wneud yn hyfforddwr ar chwaraewyr ifanc y clwb o Fanceinion yn 1981, ac ymhlith ei ddisgyblion cynnar oedd Mark Hughes, Norman Whiteside a Wes Brown.

Daeth yn fwyaf enwog yn sgil llwyddiant ei dîm yn ystod yr 1990au cynnar, gyda’r tîm sy’n cael ei adnabod hyd heddiw yn ‘Ddosbarth 92’. Roedd y tîm hwnnw’n cynnwys unigolion fel David Beckham, Paul Scholes, Nicky Butt a phrif hyfforddwr presennol Cymru, Ryan Giggs.

Yn ddiweddarach, bu Eric Harrison yn is-hyfforddwr Cymru am bedair blynedd, a hynny tra oedd Mark Hughes wrth y llyw.

Is-hyfforddwr Cymru

Yn arwain y teyrngedau o Gymru mae cyn-ymosodwr Cymru, John Hartson, sy’n disgrifio’r cyn-is hyfforddwr yn “ddyn hyfryd”.

“Mor flin i glywed am golli Eric Harrison,” meddai ar Twitter. “Fe wnes i weithio gydag Eric pan oedd yn ddirprwy Mark Hughes gyda thîm cenedlaethol Cymru.“

Mae cyn-amddiffynwr Cymru a’r sylwebydd, Dany Gabbidon, hefyd wedi rhannu rhai o’i atgofion am gyfnod Eric Harrison gyda Chymru.

“Roeddech chi wastad yn teimlo ei fod yn gwylio pob symudiad a byth yn colli unrhyw dric, felly roeddech chi’n gwneud yn siŵr nad oeddech chi’n camu allan o le,” meddai.

“Roedd ganddo rôl a oedd yn fwy yn y cefndir o dan Sparky, ond roedd ei bresenoldeb yn cael ei deimlo’n fawr gan y chwaraewyr.”

“Un o hyfforddwyr gorau ein cyfnod”

Yn ôl David Beckham, un o aelodau enwocaf ‘Dosbarth 92’, mae’n dal i gofio’r ceryddon a’r canmoliaethau a dderbyniodd yntau a’i gyd-chwaraewyr gan gyn-hyfforddwr tîm ieuenctid Manchester United.

“Yn fwy na dim, fe ddysgodd inni sut i weithio’n galed ac i barchu ein gilydd, a hynny nid ar y cae yn unig,” meddai. “Ni wnawn ni fyth anghofio’r gwersi bywyd a roddodd inni.”

Dywed cyn-hyfforddwr Manchester United, Alex Ferguson, fod ei hen gydweithiwr yn “un o hyfforddwyr gorau ein cyfnod”.

“Ar lefel bersonol, roedd gan Eric hiwmor drygionus, sych ac roedd yn barod ei dafod,” meddai wedyn. “Roeddwn i’n edmygu hynny ynddo.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Anrhydeddau Gorsedd y Beirdd 2019