“Dim penderfyniad ffurfiol” ar Wylfa Newydd

Diweddarwyd am  
Llun gwneud o sut y bydd yr atomfa newydd yn edrych

Safle Wylfa Newydd

Llun: Horizon

Mae’r cwmni sy’n gyfrifol am y cynllun i godi atomfa niwclear newydd ar Ynys Môn wedi dweud bod “dim penderfyniad ffurfiol” wedi ei wneud ynghylch parhau â’r gwaith.

Daw’r sylw gan Hitachi yn dilyn adroddiad yn y Nikkei Asian Review sy’n honni bod bwrdd y cwmni yn debygol o roi stop ar y gwaith ar safle’r Wylfa Newydd yr wythnos nesaf.

Mae Llywodraeth Cymru wedi dweud bod yr adroddiad yn “bryderus”.

“Dyma brosiect pwysig gyda buddion economaidd sylweddol i Gymru,” meddai llefarydd y Llywodraeth.

“Byddwn yn parhau i gadw golwg fanwl ar y sefyllfa a phwyso ar Lywodraeth Prydain i wneud popeth o fewn ei allu i helpu i ddod â’r prosiect yma i Fôn.”

£12 biliwn

Mi fyddai yn costio £12 biliwn i adeiladu’r atomfa newydd, ac mae Llywodraeth Prydain wedi bod yn trafod cyfrannu at y costau gyda Hitachi.

Mae’r cwmni o Japan eisoes wedi buddsoddi £2 biliwn yn y safle, ond mae pryderon bod costau yn cynyddu.

Yn dilyn yr adroddiad am roi stop ar y gwaith, fe gynyddodd gwerth cyfranddaliadau yn Hitachi gan 8%.

Mae’r cwmni yn pwysleisio bod “dim penderfyniad ffurfiol” wedi ei wneud ynghylch dyfodol y prosiect allai ddod â 6,000 o swyddi adeiladu dros dro i Fôn, a 1,000 o swyddi parhaol.

Ond mae Hitachi yn cydnabod bod rhoi stop ar y gwaith yn opsiwn wrth iddyn nhw “asesu effaith ariannol y prosiect” ar y cwmni.

“Dros ddegawd wedi ei wastraffu ar Wylfa”

Mae PAWB – Pobol Atal Wylfa B – wedi cyhoeddi datganiad yn “croesawu adroddiadau o Siapan sy’n awgrymu’n gryf y bydd cwmni Hitachi yn rhewi eu prosiect i godi atomfa yn yr Wylfa.

“Os bydd hyn yn cael ei gadarnhau mewn cyfarfod o Fwrdd Hitachi yr wythnos nesaf yna bydd yn rhyddhad i bob un ohonom sy’n poeni am ddyfodol ein hynys, ein gwlad,ein hiaith, yr amgylchedd ac yn wir am ynni cynaliadwy.

“Rhybuddiodd PAWB ers blynyddoedd fod y costau ynglŷn â phrosiect Wylfa yn debygol o fod yn faen tramgwydd angheuol i’r prosiect, ond cawsom ein hanwybyddu.

“O ganlyniad buddsoddwyd miliynau o arian trethdalwyr Ynys Môn, Cymru a’r Deyrnas Unedig yn hyrwyddo Wylfa B.

“Yn ogystal buddsoddwyd cyfalaf gwleidyddol, a gwelwyd methiant i drafod yn aeddfed y prosiect heblaw yn nhermau swyddi ac arian.

“Gwaddol hyn, os mai gwir y darogan o Siapan, yw fod dros ddegawd wedi ei wastraffu ar Wylfa, ac ychydig iawn o gynllunio economaidd amgen wedi digwydd.

“Addawyd swyddi i’n pobl ifanc ar seiliau simsan.  Difethwyd tir da i greu isadeiledd i gefnogi’r diwydiant.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Anrhydeddau Gorsedd y Beirdd 2019