Dod o hyd i hen bosteri wrth adnewyddu Y Cŵps yn Aberystwyth

Diweddarwyd  

Un o’r posteri yn dod i’r golwg yn Y Cŵps

Llun trwy ganiatad James Fox

Mae rheolwr newydd un o dafarndai enwocaf Aberystwyth wedi dod o hyd i hen bosteri wrth adnewyddu’r adeilad.

Cafodd y Cŵps ei chau ym mis Tachwedd 2017, ond ar ôl misoedd o fod yn segur, mae dyn busnes 33 oed o Dalybont, Ceredigion yn bwriadu ailagor y lle ddechrau mis Chwefror.

Ers degawdau, mae’r dafarn wedi bod yn gyrchfan i fyfyrwyr a thrigolion Cymraeg y dref, a bu hefyd yn lleoliad poblogaidd ar gyfer gigs a digwyddiadau Cymraeg.

Yn ôl James Fox, sydd wedi cymryd y brydles gan berchnogion yr adeilad, Bragdy Felin-foel, ei nod yw gwneud y dafarn yn un sy’n “agored i bawb yn Aberystwyth”.

Yn ogystal â darparu tŷ tafarn traddodiadol, mae ei gynllun busnes hefyd yn  cynnwys darparu llety a chaffi sydd â phwyntiau gwefru a mynediad i’r we.

‘Hen bosteri cwrw a ffilmiau’

Mae’r gwaith o “foderneiddio” y dafarn eisoes wedi cychwyn, yn ôl James Fox ymhellach, ac wrth gydnabod pwysigrwydd y lle i drigolion y dref, fe gynhaliodd pleidlais ar Facebook yn ddiweddar ynglŷn â pha liw y dylid paentio muriau allanol yr adeilad – gyda’r pleidleiswyr yn dewis Artichoke Green.

Wrth adnewyddu’r tu fewn wedyn, fe lwyddodd y rheolwr i ganfod hen bosteri a oedd yn cynnwys hysbysebion am ffilmiau a gwahanol fathau o gwrw.

Ond er i’r hen Cŵps fod yn enwog am y llu o bosteri Cymraeg a oedd ganddi ar ei waliau, ni ddaeth James Fox o hyd i’r un o’r rhain.

“Rydyn ni wedi dod o hyd i dipyn o hen bosteri,” meddai wrth golwg360. “Dw i’n hoffi gweld pethau fel hyn, yn enwedig gan eu bod nhw’n rhan o hanes.

“Ond, yn anffodus, doedden i ddim yn gallu eu hachub, gan eu bod nhw’n cadw pilio i ffwrdd.

“Wnes i ddim dod o hyd i bosteri Cymraeg. Fe ddywedodd rhywun fod yna fap Cymraeg yn rhywle, ond wnes i ddim llwyddo i ddod o hyd iddo.”

Arian a Busnes

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed