Jeremy Vine yn ystyried dysgu Cymraeg gyda chwmni ar-lein

Diweddarwyd am  

Jeremy Vine

Mae un o ddarlledwyr amlyca’r BBC yn ystyried dysgu Cymraeg, wedi iddo ennyn ymateb chwyrn ar Twitter am wneud sylwadau gwirion am yr iaith a’i siaradwyr.

Mae Jeremy Vine wedi treulio’r wythnos ddiwethaf yn ymateb ac yn trafod â siaradwyr Cymraeg ar-lein, gan gydnabod nad yw’n gwybod digon am yr iaith na’i diwylliant. Mae gwleidyddion a phobol eraill wedi ei wahodd i Gymru i gael gweld drosto’i hun nad ydi Cymry Cymraeg yn newid iaith pan mae Saeson yn cerdded i mewn i dafarn.

Un o’r rhai sydd wedi bod yn cynnal y sgwrs gyda Jeremy Vine yw Aran Jones o SaySomethinginWelsh – cwmni sydd yn cynnig gwersi a chefnogaeth i ddysgwyr dros y we.

“Mi wnes i yrru ambell beth ato fo a oedd yn trafod y pwnc heb wir ddisgwyl iddo fo ymateb,” meddai Aran Jones.

“Ond yn fuan iawn fe ddechreuodd o ail-drydar ambell erthygl gefnogol i’r Gymraeg, ac wedyn roedd o wedi dilyn fy nghyfri personol ac yn gyrru negeseuon uniongyrchol ata’ i yn holi am wersi Cymraeg.

“Rydan ni wedi sgwrsio dipyn ers hynny, a phwy a ŵyr na fydd o’n ymuno â’r rhengoedd o ddysgwyr sydd yn troi at y Gymraeg bob dydd,” meddai Aran Jones wedyn.

Cefndir y cwmni

Mae gan SaySomethinginWelsh ddysgwyr ar hyd a lled y byd ac mae’r cwmni’n dathlu ei ben-blwydd yn ddeg oed eleni.

Mae’r rhai sydd wedi dewis y dull yma o ddysgu yn hoff o’r cyrsiau ar-lein a’r gefnogaeth sydd ar gael gan staff y cwmni i ymarfer dros y we. Mae pwyslais y cyrsiau ar siarad yn hytrach na darllen ac ysgrifennu, a’r bwriad yw helpu’r dysgwyr ddod yn rhugl eu sgwrs mor fuan â phosib.

“Tra ‘mod i’n deall yn iawn pam fod pobol wedi ymateb mor chwyrn i sylwadau cychwynol Jeremy Vine, mae’n bwysig gwybod pryd i roi’r gorau i weiddi a dechrau siarad,” meddai Aran Jones.

“Tynnu pobol at y Gymraeg sydd yn bwysig – does dim modd gwneud hynny gyda phawb, wrth gwrs, ond fe ddaeth hi’n amlwg yn weddol fuan fod gan Jeremy Vine ddiddordeb gwirioneddol mewn gwybod mwy am yr iaith.

“Rydw i’n hynod o falch ei fod o wedi dewis cyfathrebu gyda nifer ohonon ni mewn ffordd gadarnhaol, gan obeithio rŵan y daw o’n gyfaill i’r iaith Gymraeg.”

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed