Geraint Thomas ymysg y Cymry ar restr anrhydeddau’r Frenhines

Diweddarwyd am  

Geraint Thomas, enillydd Tour de France 2018

Llun: Pete Goding/PA Wire

Mae’r seiclwr Geraint Thomas a’r canwr pop Mike Peters ymhlith y Cymry sydd ar restr anrhydeddau’r Frenhines eleni.

Maen nhw’n cael eu eu hanrhydeddu am eu cyfraniad i’w cymunedau, i elusennau, i fyd iechyd, i gerddoriaeth a chwaraeon.

Mae’r awdur Philip Pullman – a dreuliodd ran o’i blentyndod yn Ardudwy –  a chyn-Ysgrifennydd Cymru, John Redwood yn cael eu hurddo’n farchogion.

Mae Geraint Thomas eisoes yn MBE ers  2008 yn dilyn ei lwyddiant yng Ngemau Olympaidd Beijing, ac mae’n derbyn yr anrhydedd ddiweddaraf – yr OBE –  wedi iddo ennill y Tour de France eleni.

Mae canwr y band The Alarm, Mike Peters, o Prestatyn, yn derbyn MBE am ei waith yn codi arian i wella gofal a chefnogi cleifion â chanser.

Mae Reynette Roberts yn cael MBE am ei gwaith gwirfoddol gyda cheiswyr lloches yng Nghaerdydd, a Leon Gardiner Fedal yr Ymerodraeth Brydeinig BEM am ei gefnogaeth i elusennau Tŷ Hafan a MacMillan.

Mae Shaun Stocker o Wrecsam, milwr a gollodd ei ddwy goes yn Afghanistan, yn cael BEM am ei waith elusennol.

Ymhlith y lleill y mae Janice Ball yn cael BEM am ei gwasanaeth i gerddoriaeth – fel sylfaenydd côr Forget Me Not. Ac mae Tomos Hughes o Gerrigydrudion hefyd yn cael ei anrhydeddu am ymgyrchu i gael diffibrilwyr yn Nyffryn Clwyd.

Mae Jeffrey Howard o Bontprennau yn derbyn BEM am ei wasanaeth i gerddoriaeth.

Mae Joe Rowlands, bachgen 13 oed a achubodd ei dad Paul wedi iddyn nhw fynd i drafferthion mewn caiac ger Ynys Dylais, Môn, yn derbyn cymeradwyaeth o ddewrder y Frenhines.

Mae dau o wirfoddolwyr Cymreig yr RNLI – Graham Drinkwater o Gaergybi a Robert Harris o Bort Talbot – yn derbyn MBE.

Cydnabyddir Barry Liles, Pencampwyr Sgiliau Cymru a Phro Is-Ganghellor Prifysgol Cymru y Drindod Dewi Sant gyda’r MBE am ei wasanaethau i sgiliau a phobol ifanc yng Nghymru.

Mae’r deifwyr John Volanthen a Richard Stanton, sy’n rhan o dîm achub ogofau de a chanolbarth Cymru, yn derbyn medalau George.

Roedden nhw’n rhan o’r tîm aeth i Wlad Thai ym mis Gorffennaf i achub dwsin o fechgyn a’u hyfforddwr a fu’n sownd mewn ogof am dair wythnos.

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed