Panto Theatr Fach Llangefni – “rhywbeth unigryw i’r ardal”

Diweddarwyd am  

Llun: CC0

Yr hyn sy’n gwneud pantomeim Theatr Fach Llangefni yn “unigryw” yw’r ffaith ei fod yn “rhywbeth i’r ardal”, yn ôl ei gyfarwyddwr am eleni.

‘Robin Sion ap Croeso’ yw enw’r panto gan y theatr enwog ym Môn ar drothwy’r Ŵyl, sef addasiad yr awdur Gareth Evans Jones o sgript gan Hywel Gwynfryn a Caryl Parry Jones.

Bu’r criw o actorion ifanc rhwng 19 i 35 oed wrthi’n cynnal y pantomeim am gyfnod o wythnos ynghanol y mis (Rhagfyr 3-8), ac fe werthyd pob un tocyn ar gyfer y gwahanol berfformiadau, meddai Caryl Bryn.

“Yr un criw sy’n actio,” meddai wrth golwg360. “Fe fuon ni’n ystyried cael actorion newydd aton ni, ond roeddwn i’n gweld hynny’n sbwylio petha wedyn.

“Mae pobol yn nabod y bobol yn y cast. Un noson, cawson ni griw o Ffermwyr Ifanc Bodedern yn llenwi’r gynulleidfa yn llwyr, ac roedd y cast yn gallu newid eu jôcs a chyfeirio at bobol Bodedern…”

‘Tro cyntaf i bopeth’

Er bod y Theatr Fach yn cynnal pantomeim adeg y Nadolig yn flynyddol, eleni oedd y tro cyntaf erioed i Caryl Bryn gymryd yr awenau. Ond mae’n mynnu nad oedd hynny’n fwriad ganddi ar y cychwyn.

“Actio roeddwn i fod ei wneud yn wreiddiol, ond roedd y cyfarwyddwr [Gareth Evans Jones] yn methu â gwneud oherwydd ei waith yn y brifysgol,” meddai.

“Doeddwn i erioed wedi cyfarwyddo o’r blaen, dim ond fel rhywbeth yn y brifysgol, ond dyma fi’n meddwl, ‘duwcs, fe wna i’.

“Roedd o’n brofiad arbennig. Doedd yna’r un diwrnod lle ro’n i’n teimlo, ‘o! mae isho mynadd’. Dw i wedi mwynhau pob eiliaid ac roeddwn i’n edrych ymlaen, os rhywbeth, at ei wneud o.

“Mae’n chwith peidio â mynd yna bob nos, achos doeddwn ni ddim yn gneud dim byd ond chwerthin.”

Trafferthion?

Mae Caryl Bryn yn dweud bod cyfarwyddo’r cynhyrchiad wedi bod yn “waith digon hawdd” iddi, ond bu’r wythnos o berfformiadau ddim heb eu helbulon, meddai wedyn.

“Nos Wener, roedd yna ryw gamddealltwriaeth wedi bod yn rhywle dros bwy oedd yn gneud y sain,” meddai.

“Am tua deng munud i saith, daeth y dyn golau draw yn gofyn pwy oedd yn gneud y sain heno… ‘wel, Llion’, medde fi.

“‘Ond dydy o ddim yn dod’, meddai wedyn, felly am ddeng munud i saith, roedd yn rhaid i fi fynd i fyny a gneud y sain, ac roeddwn i erioed wedi’i neud o o’r blaen. Fe ges i fy lluchio i mewn i’r peth.

“Ond mi aeth o’n champion, ac roedd o’n iawn.”

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed