“Rwyt ti’n gneud y panto” – siars i Hywel Gwynfryn gan ei wraig

Diweddarwyd am  

Hywel Gwynfryn yn ei gostiwm

Llun: Cwmni Mega

Mae Hywel Gwynfryn yn dweud bod ymuno â chast pantomeim wedi bod yn “therapi” iddo yn ystod yr wythnosau diwethaf, ac yntau newydd golli ei wraig.

Tan ganol mis Rhagfyr, bu’r darlledwr yn teithio ledled Cymru yn rhan o’r sioe ‘Branwen’, a gafodd ei chynhyrchu gan Gwmni Mega a’i chyfarwyddo gan yr actor, Huw Garmon.

Roedd Hywel Gwynfryn yn chwarae rhan y cawr, Bendigeidfran, a dywed fod ymuno â chwmni o actorion wedi bod yn brofiad “ffantastig” iddo.

Ond ychwanega na fyddai wedi gwneud hyn oll heb y siars a gafodd gan ei wraig ychydig wythnosau cyn iddi farw yn gynharach eleni.

“Help garw”

“Ro’n i wedi cytuno i wneud rhan Bendigeidfran fisoedd yn ôl, ac yn ystod y cyfnod hwnnw roedd fy ngwraig i’n sâl efo canser,” meddai Hywel Gwynfryn wrth golwg360.

“Yn ystod yr wythnosau olaf wedyn, ro’n i’n siarad efo’n gilydd, ac un peth wnaeth hi ddweud wrtha i oedd, ‘dw i’n gwybod dy fod ti’n meddwl peidio gneud y pantomeim, on’d wyt?’ Ac fe ddwedodd hi, ‘paid ti â meiddio dweud wrth DH [Dafydd Hywel] nad wyt ti’n gneud y Panto…

“Roedd hynny’n gymorth mawr i mi oherwydd wedyn mi roeddwn i’n gneud y clownio ar y llwyfan gyda’i bendith hi.

“Bu hynny’n help garw a bu gneud y Panto hefyd yn rhyw fath o therapi. Roedd rhywun yn cael anghofio’r sefyllfa yr oedd o ynddo, ac mae o ynddo.”

“Syniad ramantus”

Ar wahân i “gameo byr” ym Mhanto Felin-fach yn yr 1980au, a sgrifennu sawl sgript pantomeim ar y cyd â Caryl Parry Jones dros y blynyddoedd, dyma’r tro cyntaf i Hywel Gwynfryn fod â rhan sylweddol mewn pantomeim proffesiynol, meddai.

Ychwanega ei fod yn “dychwelyd at ei wreiddiau” wrth gamu i’r llwyfan, gan iddo gael ei hyfforddi’n actor yn y Coleg Cerdd a Drama yng Nghaerdydd ar ddechrau’r 1960au.

“Mae gen i’r syniad ramantus yma o fod efo criw o bobol yn teithio o le i le, yn byw gyda’i gilydd fel teulu, a mynd i’r theatr i newid a pharatoi i actio,” meddai.

“Syniad ramantus fel roedd yn digwydd ers talwm, pan oedd Twm o’r Nant yn mynd â’i wagen o le i le ac yn perfformio’i anterliwtiau.”

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed