Chwarter trenau Trafnidiaeth Cymru “allan o wasanaeth”

Mae Trafnidiaeth Cymru, sydd yn rhedeg gwasanaethau trên yng Nghymru ers mis yn unig, wedi cyhoeddi bod 36 allan o 127 o’u trenau allan o wasanaeth oherwydd gwaith trwsio.

Daw’r newyddion wrth iddyn nhw ymddiheuro i  gwsmeriaid Cymru “sy’n haeddu gwell” wasanaethau trên yn y wlad.

Dywedodd y cwmni eu body n cynnal gwaith trwsio oherwydd bod dail  wedi achosi niwed i’r trenau yn ystod Storm Callum.

Mae bysiau wedi gorfod cael eu defnyddio heddiw i redeg rhwng Blaenau Ffestiniog a Chyffordd Llandudno oherwydd hyn, tra bod llai o wasanaeth ar waith rhwng Wrecsam a Bidston.

“Heb dderbyn  gwasanaeth haeddiannol”

Mewn hysbyseb yn y Daily Post heddiw, cyhoeddodd Rick Davey – prif swyddog gweithredoedd  Trafnidiaeth Cymru, ac Alison Thompson – prif swyddog gweitredu Network Rail, eu bod yn ymddiheuro ar y cyd.

“Rydym yn gwybod bod gorlenwi ac ansicrwydd yn her fawr i bobol, ac rydyn ni’n ymddiheuro nad ydych wedi derbyn y gwasanaeth rydych yn haeddu a’i ddisgwyl.”