Troi hen eglwys ger Llanbed yn ganolfan i’r gymuned

Diweddarwyd  
Eglwys Sant Sulien, Silian

Eglwys Sant Sulien, Silian

Llun: golwg360

Mae grŵp o bobol leol yn bwriadu troi hen eglwys mewn pentref ger Llanbedr Pont Steffan yn ganolfan gymunedol.

Fe gaeodd Eglwys Sant Sulien ym mhentref Silian ei drysau am y tro olaf bron i ddwy flynedd yn ôl oherwydd bod y gynulleidfa wedi lleihau, a rhesymau eraill yn ymwneud â chynnal a chadw’r adeilad.

Ond ers hynny, mae menter gymunedol wedi llwyddo i dderbyn prydles 25 mlynedd gan yr Eglwys yng Nghymru, mewn cam sy’n cael ei ystyried yn un “unigryw”.

Y bwriad yw creu canolfan a fydd yn cynnwys arddangosfa o greiriau hanesyddol yr eglwys a lleoliad ar gyfer gweithgareddau cymunedol.

Tristwch

Mae Menter Silian, sy’n gyfrifol am y prosiect, yn cynnwys tua dwsin o aelodau, gyda bron pob un ohonyn nhw’n byw yn yr ardal leol.

Yn ôl Eryl Evans, un o’r aelodau hynny, yr hyn a’u hysgogodd i gychwyn y prosiect yw’r ffaith nad oes yna le i’r gymuned gyfarfod yn Silian bellach.

“Fe gaeodd yr ysgol fach yn Silian yn yr 1970au, ac mae’r siop a’r swyddfa’r post wedi hen gau, a does dim tafarn yma,” meddai wrth golwg360.

“Ry’n ni’n clywed am bobol yn symud i mewn i’r pentref a dydyn ni ddim yn nabod ein gilydd achos does unman i gwrdd.

“Ry’n ni’n teimlo’n drist hefyd, mewn ffordd, fod adeilad mor brydferth yn mynd ar ei waethaf.”

Canolfan i’r gymuned gyfan

Mae’r fenter wedi derbyn cyllid o’r grant cymunedol Cynnal y Cardi a’r Gronfa Treftadaeth Bensaernïol.

Er nad yw cyflwr yr eglwys wedi “gwaethygu lot” ers iddi gau, meddai Eryl Evans, mae astudiaeth ddichonoldeb yn cael ei chynnal ar hyn o bryd er mwyn gweld pa waith sydd angen ei wneud.

Mae’r fenter hefyd yn y broses o gasglu syniadau gan bobol leol, a bydd cyfarfod agored yn cael ei gynnal yng nghlwb rygbi Llanbedr Pont Steffan yr wythnos nesaf (dydd Iau, Tachwedd 15) ar gyfer hynny.

“Mae’r ochr hanesyddol yn bwysig iawn i’r eglwys, ond mae’n rhaid iddo fod yn fwy na hynny,” meddai.

“Beth rydyn ni’n gobeithio ei wneud yw tynnu’r seddi mas, ac wedyn defnyddio’r rhan yna ar gyfer pethau cymdeithasol fel ioga, cinio i’r henoed neu jyst rhywle i gwrdd.

“Mae cwpwl o bobol hefyd wedi dweud y bydden nhw’n lico gweld mast ffôn symudol lan ´na, achos does dim signal yn y pentref.

“Efalle, sen ni’n gallu cael Broadband, y bydd yna le wedyn i bobol fynd i wneud eu gwaith – ac efalle cael cornel bach i bobol gael rhenti fel swyddfa.”

Cefn Gwlad

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed