AC yn cymharu Lesley Griffiths â “Donald Trump Cymreig”

Diweddarwyd  

Lesley Griffiths

Llun: Cynulliad Cenedlaethol Cymru CC 2.0

Mae un o aelodau grŵp Plaid Cymru yn y Cynulliad wedi galw’r Ysgrifennydd tros Faterion Amaeth yn “Donald Trump Cymreig” yn ystod dadl danllyd yn y Siambr ym Mae Caerdydd heddiw (dydd Mercher, Hydref 24).

Roedd Llŷr Huws Gruffydd, llefarydd Plaid Cymru ar Faterion Amaeth, yn cyfeirio at sylwadau a wnaeth Lesley Griffiths yn y Farmers Guardian yr wythnos ddiwethaf ynglŷn â dod â chymorthdaliadau uniongyrchol i ffermwyr i ben.

Mae Llywodraeth Cymru wedi bod yn cynnal ymgynghoriad ar y mater ers dechrau’r haf, sy’n rhoi cyfle i ffermwyr leisio’u barn ar ddau gynllun newydd i ariannu’r sector amaeth wedi Brexit.

Er bod undebau’r ffermwyr eisiau i Lywodraeth Cymru gadw elfennau o’r cymorthdaliadau presennol, sy’n rhoi arian i ffermwyr yn dibynnu ar faint o dir sydd ganddyn nhw, mae Lesley Griffiths yn awyddus i gyflwyno system hollol newydd.

Mae Llŷr Huws Gruffydd wedi cyhuddo’r Ysgrifennydd o gynnal ymgynghoriad gan anwybyddu lleisiau’r ffermwyr.

“Traed moch”

“Rydych chi’n dechrau ymddwyn yn debyg i Donald Trump Cymreig,” meddai Llŷr Huws Gruffydd.

“Pryd mae ymgynghoriad ddim yn ymgynghoriad? Wel, pan mae ysgrifennydd y cabinet yn amlwg wedi penderfynu’n union beth y mae hi am ei wneud er gwaethaf yr hyn y mae unrhyw un arall yn ei ddweud.

“Dyw hi ddim yn edrych yn dda, ond ‘dyw hi? Rydych chi wedi gwneud traed moch o’r broses hon.”

“Ymgynghoriad ystyrlon”

Mewn ymateb, dywedodd Lesley Griffiths ei bod hi wedi bod yn glir ers cychwyn yr ymgynghoriad y bydd yn rhaid i’r cymorthdaliadau presennol “ddod i ben”, oherwydd nad yw’r system yn “addas” i ffermwyr Cymru.

Dywed ymhellach y bydd hi’n “ystyried” yr holl ymatebion a ddaw yn sgil yr ymgynghoriad, cyn gwneud penderfyniad pellach.

Mae disgwyl i’r cynlluniau newydd ddod i rym erbyn 2025, ac maen nhw’n cynnwys grantiau i fusnesau a chronfa ar gyfer ffermwyr sy’n gwella’r amgylchedd.

Bu Undeb Amaethwyr Cymru ac NFU Cymru yn cynnal cyfarfod ar y cyd ym Mae Caerdydd heddiw, lle bu’r ddau’n amlinellu’r hyn y maen nhw’n credu ddylai ddigwydd i gymorthdaliadau wedi Brexit.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer