Ffair y Borth: ymddygiad gwrth-gymdeithasol “ddim yn gonsyrn mawr”

Diweddarwyd  

Stondin ffair

Llun: CC0

Mae cynghorydd o Fôn yn dweud nad oes angen mesurau arbennig i atal ymddygiad gwrth-gymdeithasol adeg Ffair y Borth eleni – er bod pobol leol wedi cael lle i gwyno am ddifrod i eiddo a cheir y llynedd.

Mae Ffair y Borth wedi cael ei chynnal yn y dre’ ar lannau’r Fenai ers y 17eg ganrif, gan ddefnyddio’r un dyddiad bob blwyddyn, sef Hydref 24 (dydd Mercher yr wythnos hon).

Y llynedd, fe fu rhai’n pryderu bod y digwyddiad yn arwain at ymddygiad gwrth-gymdeithasol, gyda phobol yn defnyddio’r ffair yn esgus i feddwi ac i amharu ar drigolion y dref.

Ond wfftio’r pryderon hyn y mae’r Cynghorydd Meirion Jones, gan ddweud nad oes llawer o broblemau o’r fath wedi bod yn y blynyddoedd diwethaf.

“Dim consyrn mawr”

“Dyden ni ddim wedi bod yn ymwybodol [o broblemau gwrth-gymdeithasol], a doedd yna ddim byd yng nghyfarfod y cyngor tref,” meddai’r cynghorydd, sy’n un o dri sy’n cynrychioli ward Aethwy ar Gyngor Môn, wrth golwg360.

“Does yna ddim consyrn mawr am y peth. Mae yna rywfaint wedi bod yn y gorffennol, ond dydi o ddim wedi bod yn broblem fawr sy’n cadw pobol draw.

“Fel arfer, dw i’n gwneud pwynt o fynd i lawr [i’r ffair] a jyst cerdded o gwmpas, ac yn y blynyddoedd dw i wedi bod yna, does dim byd wedi digwydd.”

Problem trwy gydol y flwyddyn

Mae Michael Davies yn aelod o Gyngor Tref Porthaethwy, ac mae’n dweud mai’r prif bryder adeg y ffair ar Hydref 24 bob blywyddyn yw “parcio”, gan fod prif feysydd parcio’r dre’ yn gorfod cau am ddyddiau.

Ond mae’n cyfaddef hefyd bod ymddygiad gwrth-gymdeithasol yn broblem ym Mhorthaethwy trwy gydol y flwyddyn.

“Dw i’n meddwl bod yna dipyn o ymddygiad anghymdeithasol ym mhob man,” meddai. “Mae’n enwedig o ddrwg ym Mhorthaethwy, a dydi’r heddlu ddim eisiau gwybod oherwydd does ganddyn nhw ddim mo’r cryfder rhagor.

“Does neb, fwy neu lai, ym Mhorthaethwy heblaw am un heddwas. Dw i’n siŵr y bydd ganddyn nhw ragor wedi’u hanfon ar gyfer diwrnod y ffair, ond mae’r rhif yn fach, yn anffodus.

“Rydan ni’n gwybod pwy sy’n creu’r problemau, ond beth ydach chi’n wneud â nhw ydi’r broblem fwyaf.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed