Bod yn golofnydd wedi “rhoi hwb” i Hywel Gwynfryn

Diweddarwyd  

Hywel Gwynfryn

Mae Hywel Gwynfryn yn dweud mai ysgrifennu colofnau wythnosol i gylchgrawn Golwg a fagodd ynddo’r hyder i ysgrifennu ymhellach.

Mae Hywel Gwynfryn wedi bod yn wyneb ac yn llais cyfarwydd yn y byd darlledu ers dros hanner canrif, ac mae hefyd wedi ysgrifennu cofiannau i Ryan a Ronnie, a Margaret Williams.

Wrth edrych yn ôl ar ei gyfnod yn golofnydd Golwg ar ddiwedd yr 1980au, mae’r darlledwr a’r cyflwynydd yn dweud bod y cyfnod hwnnw o ysgrifennu’n gyson wedi bod yn “brofiad gwych”.

“Byr ac i’r pwynt”

“Mae’n brofiad da pan ydach chi’n sgrifennu rhywbeth yn fyr ac i’r pwynt,” meddai wrth golwg360. “Does ganddoch chi ddim amser i ragymadroddi o gwbwl.

“Dw i ddim yn cofio faint o eiriau yr o’n i’n ei gael; weithiau, roedd o’n ddwywaith yr hyn oeddan ni eisio pan oedd y syniadau’n brin, ond fel arall ro’n i’n teimlo, ‘damia, biti nad oes gen i ddim rhyw baragraff arall’.

“Faswn i’n mynd mor bell â dweud mai sgrifennu’r golofn i Golwg a gorfod gwneud hynny yn rheolaidd, ddaeth â’r hwb i mi wedyn i fynd ymlaen i sgrifennu’r ychydig gofiannau yr ydw i wedi’u gwneud, felly yn hynny o beth mi oedd o’n brofiad gwych.”

Siarad â’r gynulleidfa

Yn ôl Hywel Gwynfryn, roedd ei golofnau gan amlaf yn cynnwys y dull o chwarae ar eiriau, ac yn aml iawn roedd yn ysgrifennu colofn o gwmpas gair neu ymadrodd a oedd yn dod i’w feddwl.

Mae hefyd yn dweud mai’r hyn yr oedd yn ceisio ei wneud oedd “siarad trwy’r golofn gyda fy nghynulleidfa”.

“Doedd o ddim yn llenyddol mewn unrhyw ffordd,” meddai wedyn. “Ro’n i am i bobol fwy neu lai glywed be’ oedd yn fy mhen i ar bapur. Fel y dywedodd Gerallt Lloyd Owen: ‘I glywed llais a gweld llun’.

“Ond mae’n rhaid i mi gyfaddef fod siarad ar y radio i mi yn llawer haws.

“Roeddwn i’n meddwl y byd o’m colofn, felly roeddwn i’n rhoi, falla, ormod o amser i geisio cael y golofn honno mor berffaith ag y medrwn i ei chael hi.

“Yn hynny o beth, roedd yna fwy o waith o lawer mewn creu colofn nag sydd mewn siarad ar y radio.”

Clonc360

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed