O’r Herald, i werthu ffîd anifeiliaid, i’r brifwyl – taith Elfed Roberts

Diweddarwyd am  

Elfed Roberts

Llun: Llywodraeth Cymru

Y teimlad o fod “eisiau newid byd” a arweiniodd Elfed Roberts i adael byd newyddiaduraeth a chychwyn ar daith a’i arweiniodd i fod yn Brif Weithredwr yr Eisteddfod Genedlaethol.

Mae’r gŵr sy’n hanu o Ben-y-groes, Dyffryn Nantlle,  wedi bod yn bennaeth ar y brifwyl ers 1993. Ond cyn hynny, fe fu’n gweithio i’r Urdd, yn gwerthu bwydydd anifeiliaid i ffermwyr ac yn gyw newyddiadurwr i bapur newydd yng ngogledd Cymru.

Bu’n ohebydd i’r Herald yng Nghaernarfon er pan adawodd yr ysgol yn 17 oed, ond ar ôl treulio 11 mlynedd yn gohebu, fe ddaeth i’r casgliad ei fod “wedi gwneud digon”.

“Ro’n i’n mwynhau lot o bethau roeddwn i’n ei wneud, hynny ydi cyfarfod pobol a phethau felly,” meddai Elfed Roberts wrth golwg360.

“Ond roedd yna hefyd bethau oedd ddim mor ddeniadol, hynny ydy mynd i gyfarfodydd cyngor sir a chyngor dosbarth a rhyw bethau felly.

“Roedd o’n gallu bod yn eitha’ diflas gwrando ar gynghorwyr yn siarad ac yn siarad ac yn siarad, felly roeddwn i ddim yn rhy awyddus i dreulio fy mywyd yn gwneud hynny.

“Roeddwn i’n meddwl y buasai angen newid bach arna’ i, ac wedyn y swydd gynta’ a gefais i ei chynnig oedd swydd efo cwmni a oedd yn gwerthu bwydydd i anifeiliaid.

“Mi ddysgais i lot fawr yn fan’no – dysgu sut i drin ffermwyr, dysgu sut i werthu eich hun, ac wedyn fe ddaeth pethau yn o lew wedyn…”

Pwysigrwydd pobol

Diddordeb mewn pobol yw’r un peth sydd wedi gyrru Elfed Roberts trwy gydol ei oes, meddai wedyn.

Er bod gwaith Prif Weithredwr yr Eisteddfod y Genedlaethol yn cynnwys mynychu cyfarfodydd di ben draw, mae’n dweud ei fod yn eu mwynhau gan fod pobol yn trafod “pethau difyr”.

“Pan oeddwn i’n mynd i gyfarfodydd cyngor sir neu gyngor dosbarth, roeddan nhw’n sôn am bob math o bethau diflas – argoel, roedd hynny braidd yn llethol,” meddai am ei gyfnod yn newyddiadurwr.

“Ond pan dw i’n mynd i gyfarfodydd efo’r Eisteddfod, mae’n o’n ymwneud yn uniongyrchol efo fy ngwaith i, ac efo pethau mae gen i ddiddordeb ynddyn nhw.

“Mae hynny tipyn yn wahanol.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones