Cau swyddfa’r Carmarthen Journal am “ladd” y papur, meddai cyn-olygydd

Diweddarwyd am  

Llun: CCO

Mae cyn-olygydd y Carmarthen Journal yn dweud bod y penderfyniad i gau’r swyddfa yn nhref Caerfyrddin, yn mynd i “ladd” y papur wythnosol.

Daw’r sylwadau yn dilyn y cyhoeddiad gan gwmni Reach PLC (Trinity Mirror gynt) i beidio ag adnewyddu’r les ar eu swyddfa yng Nghaerfyrddin.

Fe fydd y chwech aelod o staff sy’n gweithio yno ar hyn o bryd yn gorfod naill ai symud i swyddfa’r cwmni yn Abertawe neu weithio o gartre’.

“Cylch marwol”

Yn ôl Robert Lloyd, a ddechreuodd ei yrfa ym myd newyddiaduriaeth gyda’r Carmarthen Journal ddiwedd y 1970au, mae’r penderfyniad diweddara’ hwn gan Reach PLC yn creu “cylch marwol” i’r papur newydd.

“Dw i ddim yn gwybod beth yw eu cynllun busnes, ond maen nhw’n rhan o gylch marwol i ladd y papur i ffwrdd,” meddai wrth golwg360.

“Beth sydd gennych chi nawr yw papur newydd sydd â thipyn o gynnwys cyffredinol, sy’n cael ei rannu â’r Evening Post, The Western Mail a’r Llanelli Star.

“Mae ganddyn nhw naw tudalen o’r hyn dw i’n ei ddisgrifio yn ddim ond fluff; pethau fel gwyliau, beauty tips a phethau sydd ddim yn berthnasol i gyhoeddiad da.”

“Rhan o’r gymuned leol”

Mae’r cyn-olygydd yn ychwanegu bod apêl y Carmarthen Journal wedi “dirywio o flwyddyn i flwyddyn” yn ystod y degawd diwetha’, ac y bydd cau’r swyddfa ddiwedd y mis yn cyfrannu at hynny ymhellach.

Mae’n dweud hefyd fod addewid Reach PLC i gynnal stondin ym marchnad Caerfyrddin un diwrnod yr wythnos yn “siomedig” iddo.

“Mae angen i bapurau newydd lleol fod yn rhan o’r gymuned leol. Mae ganddyn nhw ddyletswydd i ddweud wrth bobol beth sy’n digwydd yn eu cymunedau.

“Nid pawb sy’n cael newyddion trwy gyfrwng y we, y radio neu’r teledu, felly mae’r Journal yn darparu gwasanaeth gwerthfawr, ac mae’n siom fawr bod pethau wedi dod i hyn.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed