Marw Kenny Evans o’r Wladfa, “cyfaill i’r Cilie”

Diweddarwyd  

Dic Jones gyda chadair Eisteddfod y Wladfa 1965

Llun: Ron Davies

Bu farw Kenneth ‘Kenny’ Evans o’r Wladfa, y dyn a gafodd ei gadeirio yn lle Dic Jones pan enillodd Gadair Eisteddfod y Canmlwyddiant yn 1965.

Roedd y ffermwr o Drofa Dulog yn ardal y Dyffryn, Patagonia yn 88 oed ac wedi bod mewn cartref henoed yn Nhrelew ers blynyddoedd, ac yno y bu farw heddiw (dydd Iau, Mai 10).

Yn ôl Jean Jones, gweddw Dic Jones, mae’n cofio Kenny Evans fel “dyn tawel ac annwyl iawn”. Y tro cyntaf iddi gwrdd â’r gŵr o’r Wladfa oedd yn nhafarn y Pentre Arms yn Llangrannog yn y 1960au.

“Dw i’n cofio ei gyfarfod gynta’ yn y Pentre Arms gydag Alun Cilie, achos wedd e wedi dod am wâc i Gymru am chwe mis,” meddai wrth golwg360.

“A dw i’n meddwl mai Cassie Davies [o Dregaron] ffeindiodd le iddo fe gydag Alun yn y Cilie, er mwyn iddo gael bod gyda Chymry, ac roedd yn arferiad gyda Bois y Cilie a Dic a’r criw a finne i gwrdd yn y Pentre Arms bob nos Sadwrn.”

Cyfarfod eto

Yr adnabyddiaeth gyntaf hon, meddai Jean Jones wedyn, oedd y rheswm pam ofynnodd Dic Jones i Kenny Evans i’w gynrychioli yn yr eisteddfod ym Mhatagonia yn 1965.

Ond wnaethon nhw ddim cyfarfod eto tan 2008, a hynny yn ystod ymweliad Dic Jones â’r Wladfa yn rhinwedd ei swydd yn Archdderwydd Cymru.

“Mi gethon ni groeso mowr ganddyn nhw pan ethon ni draw,” meddai Jean Jones, wrth sôn am deulu Kenny Evans.

“Da’th Kenny ddim mas i’r Eisteddfod o gwbwl, dim ond dod mas i gael te yng nghartre’ ei chwaer…

“Doedd e ddim wedi altro dim – roedd e heb heneiddio. Roedd rhyw wmed ffres gydag e.”

Kenny Evans yn sefyll ar ei draed i gael ei gadeirio yn Eisteddfod y Wladfa 1965

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd