Gwahardd Neil McEvoy o Blaid Cymru am 18 mis

Diweddarwyd  

Neil McEvoy

Llun: Plaid Cymru

Mae Plaid Cymru wedi cyhoeddi y bydd Neil McEvoy yn cael ei wahardd o’r blaid am gyfnod o flwyddyn a hanner.

Daw hyn wedi i Banel Gwrandawiad y blaid ddod i’r casgliad bod sail i dair o bedair cŵyn yn erbyn yr Aelod Cynulliad dros Ganol De Cymru.

Yn ôl Plaid Cymru, bu i Neil McEvoy “dorri cyfres o reolau sefydlog y blaid” ac maen nhw’n honni iddo weithredu mewn modd sydd yn “niweidiol neu a allai fod yn niweidiol” i’w henw da.

O ran ei ymddygiad yn ystod Cynhadledd Wanwyn Plaid Cymru 2017, mae’r blaid wedi barnu’r Aelod Cynulliad yn euog o  “ymddygiad… sydd yn codi dychryn, aflonyddu neu sy’n achosi loes neu ddadrithiad ymysg aelodau a/neu staff y Blaid”.

Mae’r blaid yn honni i’r gwaharddiad “adlewyrchu difrifoldeb yr achosion a gyflwynwyd i’r Panel”. Bydd modd iddo apelio’n erbyn y penderfyniad gyda chais ffurfiol i’r blaid o fewn saith diwrnod.

Ymateb Neil McEvoy

Mae Neil McEvoy wedi ymateb i’r cyhoeddiad mewn datganiad trwy nodi ei fod wedi’i ddiarddel am gael ei “groesawu mewn cynhadledd” ac am beidio â chaniatáu i Gadeirydd y blaid, Alun Ffred Jones, newid ei araith mewn cynhadledd.

Mae’n dweud y bydd yn apelio’n erbyn y “penderfyniad gwarthus hwn” a bydd ei gyfarfod ymylol yn ystod cynhadledd y Blaid y penwythnos hwn, yn mynd rhagddo er gwaetha’r cyhoeddiad.

Yn ogystal, mae’n honni bod ganddo dystiolaeth bod y Cadeirydd wedi dechrau’r ymchwiliad “cyn derbyn unrhyw gwynion ysgrifenedig” gan alw hyn yn “gamdriniaeth anghredadwy o broses”.

“Cwbwl ddiffygiol”

“Mae’r ymchwiliad honedig hwn wedi bod yn gwbwl ddiffygiol o’r cychwyn cyntaf,” meddai Neil McEvoy.

“Ni chafwyd unrhyw broses ddyledus na chyfiawnder naturiol, dim ond ymdrech barhaus gan lobïwyr i fy nhanseilio. Ni chafodd y cwynion eu trin yn unol â rheolau sefydlog y blaid ei hun.

“Mae gorfod aros dros flwyddyn ers i’r cwynion gael eu gwneud yn annerbyniol,” meddai wedyn.

“Nid oes unrhyw ddyletswydd o ofal wedi ei dangos tuag ata’ inac ychwaith st fy nheulu. Mae fy hawliau dynol wedi cael eu tramgwyddo’n ddifrifol.

“Ni chaniatawyd imi hyd yn oed gael cynrychiolaeth gyfreithiol.

“Nid aelodau cyffredin a gyflwynodd y cwynion, ac fe fydd yn sioc i aelodau llawr gwlad y Blaid wybod pam yr wyf wedi fy niarddel.”

“Gwleidyddiaeth trwy gŵyn”

Gan atseinio neges gafodd ei bostio ganddo ar Twitter ddydd Iau (Mawrth 15) mae hefyd yn dweud bod angen i “wleidyddiaeth trwy gŵyn ddod i ben”.

“Mae gen i gymaint o gefnogaeth, fel y dangosir yn y blwch pleidleisio,” meddai. “Mae hynny am fod pobol eisiau math newydd o wleidyddiaeth.

“Rydym eisiau Cymru hyderus a all sefyll ar ei thraed ei hun. Gwirionedd, gonestrwydd a chyfiawnder naturiol yw’r Blaid yr wyf yn ei hadnabod, a rhaid i ni ddychwelyd at hynny.

“Mae’n rhaid i wleidyddiaeth trwy gŵyn ddod i ben. Mae gwleidyddiaeth yn ymwneud â syniadau, ac nid cwyno diddiwedd mewn ymgais i dawelu pobol.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer