Mae’r eira dros y penwythnos yn parhau i achosi trafferthion i deithwyr ac mae mwy na 200 o ysgolion ynghau ddydd Llun.
Mae’r Swyddfa Dywydd wedi cyhoeddi rhybudd melyn am rew yng Nghymru nos Sul tan 10 o’r gloch fore Llun.
Yn ôl y rhybudd, fe fydd rhew ar ffyrdd, palmentydd a llwybrau beicio sydd heb eu graeanu, allai arwain at “ddamweiniau ac anafiadau”.
Fe fydd y tymheredd yn gostwng islaw’r rhewbwynt, a’r eira’n troi’n rhew mewn rhai mannau deheuol.
Ysgolion ynghau
Hyd yn hyn, mae yna ysgolion yn y siroedd canlynol ynghau oherwydd y tywydd:
- Blaenau Gwent
- Caerffili
- Bro Morgannwg
- Castell-nedd Port Talbot
- Merthyr Tudful
- Torfaen
- Rhondda Cynon Taf
- Pen-y-bont ar Ogwr
- Mynwy
- Powys
Trafferthion i deithwyr
Bu’r eira yn achosi trafferthion ar nifer o ffyrdd ddoe gan gynnwys Sir Gar a Rhondda Cynon Taf yn ogystal ag Aberystwyth ac yn y gogledd o gwmpas ardal Llanrwst.
Roedd y gwyntoedd cryfion hefyd wedi golygu bod un lon wedi ei chau i’r ddau gyfeiriad ar Bont Hafren, hediadau o Faes Awyr Caerdydd i Baris ac Amsterdam wedi’u canslo, a gwasanaethau fferi rhwng Cymru ac Iwerddon wedi eu gohirio neu eu canslo
Y cyngor i deithwyr yw checio gwefannau’r cwmnïau teithio.
