Tafarnau fydd capeli’r dyfodol, meddai Dafydd Iwan

Diweddarwyd am  
Tafarn Sinc

Tafarn Sinc

Llun: Gwefan Tafarn Sinc

Mae Dafydd Iwan wedi dweud yn ystod dathliad hwyr Gŵyl Ddewi ei fod yn rhagweld y bydd tafarnau’n gweithredu fel capeli yn y dyfodol.

Daeth ei sylwadau wrth iddo annerch cynulleidfa yn Nhafarn Sinc yn Sir Benfro.

Cafodd dathliad Gŵyl Ddewi cyntaf Tafarn Sinc, o dan berchnogaeth newydd, ei gynnal nos Wener – wythnos yn hwyr o ganlyniad i’r tywydd.

Roedd y mwyafrif o bobol yno’n gyfranddalwyr ac roedd rhai o’r bwytawyr wedi teithio o lefydd mor bell â Llanelli, Llanfair-ym-muallt a Colorado yn yr Unol Daleithiau.

Yn unol â’r bwriad o gefnogi busnesau lleol, busnesau lleol oedd wedi darparu’r cynhwysion ar gyfer y cawl – a’r rheiny’n cynnwys Cig Lodor, Caws Pantmawr a Phopty Rhydwen.

Cau tafarnau a chapeli

Rhybuddiodd Dafydd Iwan fod tafarnau a chapeli yng nghefn gwlad yn wynebu trafferthion, ac y gellid defnyddio tafarnau fel capeli wrth iddyn nhw gael eu cymryd drosodd fel mentrau cymunedol – fel yn achos Tafarn Sinc.

Dywedodd yn ei anerchiad: “Wrth i mi deithio i lawr o Gaernarfon euthum heibio nifer o dafarnau oedd wedi’u gorfodi i gau gan landlordiaid yn codi rhenti ymhell y tu hwnt i allu tenantiaid i wneud bywoliaeth.

“Ar yr un pryd, euthum heibio capeli oedd wedi cau a dwi’n teimlo’n aml fod pencadlysoedd yr enwadau yn poeni mwy am gael yr arian o werthiant yr adeiladau nag ydyn nhw am ryddhau’r  adeiladau i gynulleidfaoedd lleol a fyddai o bosib yn medru defnyddio eu hegni eu hunain i greu bywyd o’r newydd.”

Wrth ganmol y fenter yn Nhafarn Sinc, awgrymodd y gallai mentrau tebyg yng Nghymru ystyried cyfuno anghenion eu capeli yn eu cynlluniau ar gyfer tafarnau cymunedol.

“Mae yna rai cymunedau eisoes wedi gwneud eu neuaddau yn ganolfannau cynhwysol go iawn ac ar y Sul fe ddodir y Groes yn ganolog er mwyn cynnal oedfa grefyddol. Mae’n un ffordd y gall ardaloedd gwledig ddiogelu rhai o’u traddodiadau. Rhaid dangos menter yn lleol.”

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Tywysogion Cymru – pa rai sy’n werth eu cofio?