Tommo yn gadael Radio Cymru

Diweddarwyd am  

Andrew ‘Tommo’ Thomas

Llun: BBC Cymru

Mae prif gyflwynydd rhaglenni prynhawn BBC Radio Cymru, Andrew ‘Tommo’ Thomas, wedi cyhoeddi y bydd yn rhoi’r gorau i’w waith gyda’r Gorfforaeth.

Mae’r darlledwr o Aberteifi wedi bod yn llais cyfarwydd ar Radio Cymru i wrandawyr y prynhawn ers 2014, gyda’i raglen o 2yp tan 5yp.

Bu mewn helynt y llynedd pan gafodd ei wahardd o’i waith am gyfnod yn sgil sylwadau a wnaeth yng Ngŵyl Nôl a Mân yn Llangrannog fis Gorffennaf.

Mewn neges ar Facebook yn gynharach heddiw, mae Andrew ‘Tommo’ Thomas yn dweud y byddai’n “ffarwelio” â BBC Radio Cymru ddiwedd mis Mawrth, cyn dechrau ar swydd newydd gyda’r cwmni radio lleol, Nation Broadcasting yn Ebrill.

Gyda’r cwmni hwnnw, fe fydd yn gyfrifol am gyflwyno rhaglen newydd rhwng 11yb a 3yp, a fydd yn cael ei darlledu ar orsafoedd Radio Ceredigion, Radio Sir Gâr, Radio Sir Benfro a Bridge FM.

Bydd Ifan Jones Evans yn ei olynu yn cyflwyno rhaglenni’r prynhawn o ddydd Llun tan ddydd Iau.

“Ffrind da i Radio Cymru”

Dywedodd Golygydd BBC Radio Cymru Betsan Powys: “Mae Tommo wedi bod yn ffrind da i Radio Cymru ac fe fyddwn ni’n fythol ddiolchgar iddo am ei gwmni ac am godi gwên bob dydd.

“R’yn ni i gyd yn dymuno’n dda iddo gyda’i sioe newydd ac ar bennod newydd sbon ‘swnllyd’ arall yn ei yrfa. Diolch, Tommo!”

“Blwyddyn anodd iawn”

Yn ei neges, dywed Tommo fod y flwyddyn ddiwethaf wedi bod yn un “anodd iawn” iddo, ar ôl clywed bod ganddo ganser y croen, a gorfod delio â marwolaeth ei dad.

Bydd y swydd gyda Nation Broadcasting yn golygu y bydd dyn “y filltir sgwâr” yn gallu dychwelyd at ei “wreiddiau”, meddai.

“Mae sawl un yn gwybod mai ar radio lleol y dechreuais i fy ngyrfa ddarlledu, gan feithrin y sgiliau roddodd gyfle i fi fentro ymhellach i ddarlledu ar radio cenedlaethol,” meddai Tommo.

“Felly pan ddaeth cyfle unigryw yn ddiweddar i fynd yn ôl i ngwreiddie, roedd y gwahoddiad yn un na allwn ei wrthod.”

Gorffen mewn “cyfnod cadarnhaol”

“Mae’n galondid gwbod fod ffigurau gwrando’r orsaf yn codi’n raddol o hyd, diolch i arweiniad y golygydd Betsan Powys a’i thîm gweithgar,” meddai wedyn.

“Dw i’n gadael, felly, ar gyfnod cadarnhaol, gyda ffigurau’r rhaglen a rhai’r orsaf yn cynyddu, a dw i wir yn dymuno’n dda nid yn unig i’r orsaf i’r dyfodol, ond hefyd i’r sawl fydd yn fy nilyn i gyflwyno rhaglen y prynhawn ar Radio Cymru.”

Mi fydd ei raglen olaf ar Radio Cymru yn cael ei darlledu ddydd Iau, Mawrth 29.

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed