Teulu nofelydd Frankenstein yn dod o Dregaron a Sir Faesyfed

Diweddarwyd  

Siliwét Frankenstein

Llun CC0 trwy Commons Wikimedia

Mae gwreiddiau’r awdures a grëodd y cymeriad Frankenstein,  yn ddwfn yn siroedd Ceredigion a Maesyfed.

A hithau’n 200 mlynedd union yr wythnos hon ers cyhoeddi nofel Mary Shelley, Frankenstein: or, the Modern Prometheus ar Ionawr 1, 1818, mae’r Athro Wyn James o Brifysgol Caerdydd yn dweud ei fod wedi olrhain teulu tad y nofelydd i siroedd Maesyfed a Cheredigion.

“Roedd Mary Shelley yn disgyn oddi wrth fenyw o’r Judith Weaver,” meddai Wyn James wrth golwg360, “ac roedd hi’n dod o Sir Faeyfed ac fe fu farw yn 1746. Roedd hi’n hen fam-gu i Mary Shelley (mam-gu ei thad, William Godwin).”

‘O ardal Tregaron’

Roedd William Godwin yn nofelydd ac awdur gwleidyddol amlwg yn ei ddydd ac yn ffigwr pwysig ym mywyd diwylliannol Llundain a’r cyffiniau, lle cafodd Mary Shelley ei magu.

Wrth ymchwilio i’r achau, mae Wyn James wedi darganfod nodyn gan ddyn o’r enw J H Davies yn dweud bod William Godwin yn disgyn o deulu dylanwadol yn ardal Tregaron, sef teulu’r piwritanydd o’r 17eg ganrif, John Jones, Llwyn-rhys.

“Roedd e’n un o arloeswyr Piwritanaidd ac anghydffurfiol yr ardal, a fferm Llwyn-rhys yn dod yn ganolfan ar gyfer yr Anghydffurfwyr,” meddai.

Bywyd Llundain a Pharis

Fe gafodd Mary Shelley ei geni yn Llundain yn 1797, ac yn 16 oed, fe redodd i ffwrdd i Baris er mwyn priodi’r bardd Rhamantaidd, Percy Bysshe Shelley.

Cafodd ei sbarduno i sgrifennu ei nofel enwog tra oedd hi, ei gŵr, a’r bardd, Lord Byron, ar wyliau yn y Swistir.

Mae’n debyg i’w gŵr a’i gyfaill ei herio i sgrifennu’r stori fwyaf arswydus y gallai, ac ymhen blwyddyn fe gyhoeddodd hi’r nofel o dan y teitl Frankenstein: or, the Modern Prometheus.

“Ymwybodol iawn” o’i gwaed Cymreig

Lle bo’r nofel Frankenstein yn y cwestiwn, mae’r Athro Wyn James yn credu nad oes yna ddylanwadau Cymreig uniongyrchol arni, ond mae’n mynnu bod Mary Shelley’n “ymwybodol iawn” o’i chysylltiad â Chymru.

“Roedd ei thad hi, William Godwin, yn nofelydd ei hunan ac yn sgrifennu rhai nofele mewn cyd-destun Cymreig”, meddai.

“Roedd gan [Percy] Shelley, ei gŵr hi, nifer o gysylltiadau Cymreig hefyd; roedd e’n ymweld ag ardal Cwm Elan yn Sir Faesyfed ac yn gyfeillgar â phobol yn ardal Tremadog.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd