Fe fydd parti i ddathlu ei bywyd yn rhan o angladd yr actores, Iola Gregory, a fu farw’r wythnos diwetha’ yn 71 oed.
Fe fyddai hynny yn ysbryd ei chymeriad enwoca’, Jean McGurk neu Mrs Mac yn yr opera sebon Pobol y Cwm.
Ond, yn ôl ei ffrindiau, roedd yr actores hefyd wedi byw bywyd yn llawn, gyda gwaith arloesol yn y theatr cyn troi at deledu.
Hi oedd un o sylfaenwyr Theatr Bara Caws, a weddnewidiodd fyd y theatr Gymraeg yn yr 1970au.
Trefniadau
Fe fydd y gwasanaeth cyhoeddus yn cael ei chynnal yn Sgubor Gwersyll Llyn Gwynant, Nant Gwynant, am 12.00.
Yn dilyn y gwasanaeth fe fydd parti i ddathlu ei bywyd yn nhafarn y Tŷ’n Llan, Llandwrog, yn yr ardal lle’r oedd hi’n byw.
Bydd rhoddion tuag at fudiad PAWB (Pobol Atal Wylfa B) yn cael eu casglu er cof iddi.
