Carl Sargeant wedi’i gael yn farw

Diweddarwyd  
Llun pen ac ysgwydd o'r Aelod Cynulliad

Carl Sargeant

Llun: Cynulliad Cenedlaethol Cymru CC 2.0

Mae’r Aelod Cynulliad Carl Sargeant, 49, wedi cael ei ddarganfod yn farw, ddyddiau’n unig ar ol iddo gael ei wahardd o’r Blaid Lafur yn sgil honiadau o aflonyddu rhywiol.

Roedd  hefyd wedi colli ei swydd yn Ysgrifennydd Cymunedau a Phlant Llywodraeth Cymru tra bod ymchwiliad i “honiadau” yn ei erbyn yn cael ei gynnal.

Mewn datganiad dywedodd y teulu eu bod “wedi tristau y tu hwnt i eiriau” a’i fod yn “wr, tad a chyfaill oedd yn cael ei garu’n fawr.”

Mae arweinydd y Blaid Lafur Jeremy Corbyn wedi dweud bod ei farwolaeth yn “ofnadwy ac yn newyddion syfrdanol.”

Y gred yw fod Carl Sargeant wedi lladd ei hun. Dywed Heddlu’r Gogledd eu bod wedi eu galw i eiddo yng Nghei Conna tua 11.30yb ddydd Mawrth yn dilyn adroddiadau bod corff wedi cael ei ddarganfod.

Nid ydyn nhw’n trin y farwolaeth fel un amheus ac mae’r crwner wedi cael ei hysbysu.

“Sioc” – Carwyn Jones

Dywedodd Prif Weinidog Cymru Carwyn Jones: “Roedd Carl yn ffrind yn ogystal â chydweithiwr a dwi mewn sioc ac yn drist iawn am ei farwolaeth. Fe wnaeth Carl gyfraniad mawr i fywyd cyhoeddus Cymru a gweithiodd yn ddiflino dros y bobl roedd e’n eu cynrychioli fel Gweinidog ac Aelod Cynulliad.

“Fe fydd e’n golled fawr i ein plaid ac i’r Senedd. Mae fy nghydymdeimladau gyda’i deulu ar yr amser anodd hwn.”

Cyfarfod

Roedd disgwyl i arweinwyr pleidiau gwleidyddol Cymru drafod heddiw sut mae atgyfnerthu’r broses o ymateb i honiadau am aflonyddu rhywiol o fewn y Cynulliad.

Llywydd y Cynulliad, Elin Jones, oedd wedi galw’r cyfarfod yn dilyn gohebiaeth rhyngddi hi â Carwyn Jones yr wythnos diwethaf.

Ond mae Elin Jones wedi cadarnhau fod y Cynulliad wedi’i ohirio heddiw.

Dywedodd bod y newyddion am farwolaeth Carl Sargeant wedi bod yn “sioc enfawr”.

“Fel arwydd o barch i Carl, ni fydd y Cynulliad yn cwrdd heddiw.  Byddwn oll am fyfyrio cyn rhoi teyrnged glodwiw iddo dros y dyddiau nesaf,” meddai.

Cefndir

Mi fu Carl Sargeant yn Ysgrifennydd Cymunedau a Phlant Llywodraeth Cymru tan yr wythnos ddiwethaf pan gafodd ei wahardd o’r blaid Lafur wrth i ymchwiliad i honiadau o aflonyddu rhywiol yn ei erbyn fynd rhagddynt.

Roedd yn byw yng Nghei Conna, Sir y Fflint gyda’i wraig ac mae ganddyn nhw ddau o blant, ac fe ddaeth yn Aelod Cynulliad i Alun a Glannau Dyfrdwy yn 2003.

Cyn hynny roedd wedi hyfforddi’n ddiffoddwr tân diwydiannol ac wedi gweithio mewn ffatri gweithgynhyrchu cemegol a bu’n archwilydd ansawdd ac amgylcheddol.

Roedd wedi gwasanaethu ar Gyngor Tref Cei Conna ac yn llywodraethwr i Goleg Glannau Dyfrdwy ac Ysgol Bryn Deva.

 

 

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd