Senedd Cymru
Mae Aelodau Cynulliad newydd wedi dechrau eu diwrnod cyntaf llawn ym Mae Caerdydd.
Dechreuodd y diwrnod gyda siwrnai o amgylch syddfeydd y Cynulliad a’r Siambr ei hun.
Mae gan y 23 Aelod Cynulliad newydd wythnos brysur o’u blaenau nhw. Bydd rhaid dewis Llywydd a Dirprwy Lywydd ac yna ethol Prif Weinidog ar Gymru.
Yn ogystal â dod i nabod swyddfeydd y Cynulliad yn Nhŷ Hywel ac adeilad y Senedd, mae gan ACau becyn croeso 14 tudalen i’w ddarllen.
Fe fyddwn nhw hefyd yn mynd i gyfarfod am y Siambr, a fydd yn eu cynghori nhw ynglŷn â sut i gymryd rhan mewn cyfarfodydd llawn, ac arferion da ymysg ACau.
Yn ogystal â hynny fe fydd yna sesiwn 40 munud ar gostau Aelodau Cynulliad, a darlith am weithdrefn diogelwch y Cynulliad.
Dyw hi ddim yn eglur eto a fydd Llafur yn llywodraethu ar ei phen ei hun yntau yn clymbleidio â Phlaid Cymru neu’r Democratiaid Rhyddfrydol.
Mae gan y Blaid Lafur hanner y seddi yn y Cynulliad – digon i atal y pleidiau eraill rhag ffurfio clymblaid enfys, ond fe allai llywodraethu fod yn anodd.
Yn swyddogol mae’r Blaid Lafur yn “cadw meddwl agored”. Mae ganddyn nhw dri opsiwn – llywodraethu ar eu pennau eu hunain, clymblaid swyddogol, neu gytundeb answyddogol gydag un o’r pleidiau eraill.
Mae arweinydd y Democratiaid Rhyddfrydol, Kirsty Williams, wedi awgrymu eu bod nhw’n barod i gyd-lywodraethu.
Ond fe fyddai clymbleidio â’r Dems Rhydd yn ei gwneud hi’n anoddach i’r Blaid Lafur feirniadu’r glymblaid yn San Steffan, sydd hefyd yn cynnwys y Democratiaid Rhyddfrydol.
Mae yna aelodau o Blaid Cymru sy’n dadlau’r naill ffordd a’r llall, o blaid ac yn erbyn clymbleidio gyda Llafur fel y gwnaethon nhw yn 2007.
Dywedodd y cyn Aelod Seneddol, Cynog Dafis, heddiw y dylai Plaid Cymru ystyried clymbleidio eto, er lles y wlad yn hytrach na lles y blaid.
Serch hynny mae’r Aelod Cynulliad Rhodri Glyn Thomas a’r Aelod Seneddol Jonathan Edwards wedi awgrymu nad oes archwaeth am glymblaid arall o fewn y blaid.
Yr ACau newydd:
ACau Etholaethau
Ken Skates, Llafur, De Clwyd
Janet Finch-Saunders, Ceidwadwyr, Aberconwy
Russell George, Ceidwadwyr, Sir Drefaldwyn
Michael Hedges, Llafur, Dwyrain Abertawe
Julie James, Llafur, Gorllewin Abertawe
Keith Davies, Llafur, Llanelli
Mick Antoniw, Llafur, Pontypridd
David Rees, Llafur, Aberafan
Gwyn Price, Llafur, Islwyn
Vaughan Gething, Llafur, De Caerdydd a Phenarth
Julie Morgan, Llafur, Gogledd Caerdydd
Jenny Rathbone, Llafur, Canol Caerdydd
Mark Drakeford, Llafur, Gorllewin Caerdydd
ACau Rhanbarthol
Llyr Huws Griffiths, Plaid Cymru, Gogledd Cymru
Aled Roberts, Dems Rhydd, Gogledd Cymru
Antoinette Sandbach, Ceidwadwyr, Gogledd Cymru
Simon Thomas, Plaid Cymru, Canolbarth a Gorllewin Cymru
William Powell, Dems Rhydd, Canolbarth a Gorllewin Cymru
Rebecca Evans, Llafur, Canolbarth a Gorllewin Cymru
Byron Davies, Ceidwadwyr, Gorllewin De Cymru
Suzy Davies, Ceidwadwyr, Gorllewin De Cymru
John Dixon, Dems Rhydd, Canol De Cymru
Lindsay Whittle, Plaid Cymru, Dwyrain De Cymru