Y Lolfa “ddim mewn sefyllfa” i brynu’r Cymro

Diweddarwyd am  


Llun Golwg360
Mae un o weisg amlyca’ Cymru wedi dweud nad oes ganddyn nhw ddiddordeb mewn prynu papur newydd Y Cymro.

Yn ôl Rheolwr Gyfarwyddwr Y Lolfa, Garmon Gruffudd, doedd gan y cwmni ddim yr adnoddau i gymryd yr wythnosolyn dan ei adain.

Mae’n hysbys fod sylfaenydd Y Lolfa, Robat Gruffudd, wedi holi am y posibilrwydd o brynu’r papur yn y gorffennol.

“Pwysig iawn”

Ac fe ddywedodd Garmon Gruffudd ei bod yn “bwysig iawn, iawn” bod Y Cymro yn parhau ac y byddai’n gefnogol i unrhyw rai sydd am brynu’r papur newydd.

O ran natur y gefnogaeth honno, mae hynny’n “dibynnu ar yr amgylchiadau,” meddai.

“Go brin bydden ni jyst yn gallu taflu arian, [ond] yn amlwg byddwn ni’n parhau i hysbysebu ac yn y blaen.”

“Bwlch mawr” heb Y Cymro

Mae perchnogion y cyhoeddiad, cwmni Tindle Newspapers, wedi penderfynu ei werthu, a hynny am bris ‘nominal’, sy’n is na’i werth masnachol.

Os na fydd prynwr yn dangos diddordeb, fe fydd y fenter yn dod i ben ym mis Mehefin, 85 o flynyddoedd ers ei sefydlu..

Dywedodd Garmon Gruffudd y byddai “bwlch mawr” yn y byd cyhoeddi yng Nghymru, pe bai’r Cymro yn dod i ben.

Galw ar y Llywodraeth

“Mewn unrhyw wlad, mewn unrhyw iaith, mae ‘na bapurau newyddion print. Byddai colli’r unig bapur newydd wythnosol, cenedlaethol yn golled anferth,” meddai Garmon Gruffudd.

“Dw i’n gobeithio bod y bwlch ‘na’n cael ei lanw mewn rhyw ffordd ond o ran Y Lolfa, bydden i ddim mewn sefyllfa i gymryd yr awennau dw i ddim yn meddwl.

Ychwanegodd y dylai Llywodraeth Cymru ymyrryd er mwyn sicrhau parhad y papur newyddion.

“Pe bai’r Cymro yn dod i ben a bod neb arall yn cymryd yr awennau, byddai’n rhaid edrych ar sut gallan nhw [Llywodraeth Cymru] gefnogi rhyw fath o gyhoeddiad print,” meddai.

Rhaid newid

O drafod dyfodol Y Cymro, roedd Garmon Gruffudd yn cydnabod y byddai’n rhaid gwneud newidiadau.

“Gan fod gwefannau newyddion a newyddion 24 awr ar y teledu, mae rôl papurau newydd wedi newid felly mae’n amlwg bod unrhyw bapur newydd wythnosol yn mynd i orfod newid.

“Efallai y byddai eisiau iddyn nhw adrefnu rhywfaint ar y cynnwys a chynnwys pethau efallai sydd ddim yn dyddio mor gyflym a mwy o sylwebaeth, efallai.

“Mae pobol yn dal i brynu papurau newydd ac mae rhai papurau yn llwyddo, er enghraifft, mae cylchrediad y Private Eye yn cynyddu.

“Mae cael papur newydd print Cymraeg mewn siopau yn rhywbeth pwysig. Byddai sefyllfa bod ‘na ddim un papur newydd Cymraeg cenedlaethol yn sefyllfa druenus.”

Ymateb Llywodraeth Cymru

“Mae’n hynod o bwysig bod gennym bresenoldeb Cymraeg cryf ar bob platfform yn y cyfryngau ac er bod y newyddion yn siomedig, dylai hefyd gael ei weld fel cyfle i’r Cymro ac eraill i ystyried sut orau i ddelifro hynny,” meddai llefarydd ar ran Llywodraeth Cymru.

“Rydym eisoes wedi cyhoeddi y byddwn yn sefydlu fforwm y cyfryngau annibynnol i ystyried dyfodol y cyfryngau a darlledu yng Nghymru, gan gynnwys sector y cyfryngau print a phlwraliaeth. Mae trefniadau ar waith i sefydlu hyn.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed