“Angen brys” am eglurder ad-drefnu cynghorau

Diweddarwyd  


Mark Drakeford yw Ysgrifennydd Llywodraeth Leol Cymru.
Mae “angen brys” am eglurder ar gynlluniau Llywodraeth Cymru i ad-drefnu’r 22 o gynghorau sir yn y wlad, yn ôl y corff sy’n eu cynrychioli.

Yn ôl adroddiad Cymdeithas Llywodraeth Leol Cymru, mae “heriau mawr” yn wynebu cynghorau sir, gydag “ansicrwydd” yn ychwanegu at yr heriau hynny.

Mae disgwyl i arweinwyr pob cyngor sir yng Nghymru gyfarfod heddiw i drafod yr adroddiad a “phwyso a mesur” y sefyllfa erbyn hyn.

Yn nhymor diwethaf y Cynulliad, fe wnaeth y cyn-Weinidog Llywodraeth Leol, Leighton Andrews, gyflwyno cynlluniau posib i dorri nifer y cynghorau sir yng Nghymru o 22 i wyth neu naw.

Ond gan mai llywodraeth leiafrifol sydd gan Lafur yn y Cynulliad bellach, mae’r Prif Weinidog, Carwyn Jones, wedi cydnabod nad oes ganddo ddigon o gefnogaeth i gymeradwyo’r cynlluniau.

Mark Drakeford sydd bellach yn hen swydd Leighton Andrews, sydd â theitl newydd: Ysgrifennydd Llywodraeth Leol Cymru.

Dywedodd Ysgrifennydd y Cabinet dros Gyllid a Llywodraeth Leol, Mark Drakeford:

“Rwy’n deall bod angen eglurder ynghylch yr aildrefnu, ond er mwyn symud ymlaen rhaid i ni ddatblygu dull gweithredu y mae modd ei gyflawni ac sy’n gynaliadwy.

“Dros yr ychydig wythnosau a misoedd nesaf byddaf yn cyfarfod ag arweinwyr llywodraeth leol ymysg eraill, ac yn gwrando ar eu sylwadau cyn ystyried sut i weithredu yn y tymor hir. Mae pawb am ein gweld yn cael y broses hon yn iawn.”

“Allwn ni ddim parhau fel hyn”

“Mae’n anodd iawn (i gynghorau) symud ymlaen ar hyn o bryd,” meddai Steve Thomas, Prif Weithredwr Cymdeithas Llywodraeth Leol Cymru wrth golwg360.

“Does dim amheuaeth ei fod yn cael effaith ar forâl staff. Mae hefyd yn effeithio ar recriwtio achos dydy rhai pobol ddim am geisio am swydd gydag awdurdod penodol os na fydd yn bodoli yn y blynyddoedd nesaf.

“Dyw’r ansicrwydd hwn ddim yn iach o gwbl a dyna pam ein bod ni wedi galw am eglurder achos allwn ni ddim parhau fel hyn, mae’n rhaid i ni wybod yn fuan beth yw’r cam nesaf yn y broses.”

Mae’r Gymdeithas, sy’n “croesawu” Mark Drakeford i’w swydd newydd, wedi ysgrifennu at Carwyn Jones yn gofyn am gyfarfod neu gynhadledd rhwng y llywodraeth a’r cynghorau sir.

Doedd Steve Thomas ddim am ddweud os oedd yn hapus i weld Leighton Andrews yn gadael y swydd.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Perthynas gymhleth Cymru a Lerpwl