Gwerthu $250,000 o luniau Aberystwyth ar draws y byd

 


Mae ffotograffydd annibynnol o Aberystwyth yn dathlu gwerthu gwerth $250,000 o luniau i gylchgronau a phapurau newydd cenedlaethol ledled y byd.

Bu Keith Morris yn tynnu lluniau o Gymru ers 30 mlynedd, a thrwy asiantaeth ffotograffiaeth Alamy, mae wedi gweld ei luniau yn ymddangos mewn llu o gyhoeddiadau – o’r Telegraph i’r Daily Star, o Golwg i’r New York Times.

“Gwaith caled a gwaith cyson” sydd wrth wraidd ei lwyddiant, yn ôl Keith Morris:

“Dw i’n gweithio i gleientiaid fel Golwg, ond dw i hefyd yn gweithio ar liwt fy hunan, i dynnu lluniau sy’n dangos rhywbeth am gymdeithas, pobol, diwylliant a diwydiant.

“Dyna gryfder yr asiantaeth Alamy i fi, y ffaith mod i’n gallu gwerthu lluniau o fywyd bob dydd.”

Aberystwyth

Mae rhai yn credu fod rhaid mynd i leoliad egsotig i gael y lluniau gorau, yn ôl Keith Morris, ond dyw’r ffotograffydd ddim yn cytuno.

“Dw i ddim yn teithio. Dw i heb fod dramor ers 1987, dw i heb fod tu fas i Gymru ers pum mlynedd, dw i bron byth yn teithio tu fas i Geredigion ac mae 95% o’r gwaith dw i’n ei werthu trwy Alamy wedi cael eu tynnu ar strydoedd Aberystwyth.

“Does dim rhaid mynd i lefydd tramor i gael lluniau sy’n gwerthu ar draws y byd, mae trysorfa o luniau ar eich stepen drws chi.”

Archif hanesyddol

Ychwanegodd Keith Morris ei fod yn teimlo ei bod yn bwysig cadw cofnod o hanes trwy gyfrwng lluniau.

“Y digwyddiad mwyaf diweddar yw’r stormydd mawr ddaeth dros y gaeaf – fe wnaeth y lluniau hynny ymddangos mewn papurau ledled y byd. Dyna oedd y peth mwyaf i ddigwydd i mi o ran gwerthiant lluniau masnachol.

“Dw i’n defnyddio twitter a facebook ac fel arall dw i jyst yn mynd mas hefo camera a gweld beth sydd na ar gael.

“Dw i’n creu archif hanesyddol yn ogystal ag adnodd masnachol.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones