Carwyn Jones yn lansio ymgyrch addysg Gymraeg

Diweddarwyd  


Carwyn Jones yn siarad a disgyblion Ysgol Trelyn
Lansiodd Prif Weinidog Cymru Carwyn Jones ymgyrch addysg cyfrwng Gymraeg heddiw gyda’r bwriad o godi ymwybyddiaeth o’r iaith ymysg rhieni.

Bwriad yr ymgyrch Byw yng Nghymru: Dysgu yn Gymraeg? yw rhoi gwybodaeth a chodi ymwybyddiaeth am addysg cyfrwng Cymraeg ac addysg ddwyieithog, yn ôl y Prif Weinidog.

Ac wrth siarad yn Ysgol Gymraeg Trelyn, y Coed-duon, lle bu’n cwrdd â rhieni di-Gymraeg ac yn darllen stori Gymraeg i blant yn y dosbarth derbyn, dywedodd Carwyn Jones ei bod hi’n bwysig bod rhieni’n gwybod beth yw’r opsiynau ar gael i’w plant.

“Dydy rhieni ddim bob amser yn ymwybodol o ysgolion cyfrwng Cymraeg neu maen nhw’n ei chael hi’n anodd cael gwybodaeth am ysgolion o’r fath,” meddai Carwyn Jones. “Rwy’n deall pryderon rhai rhieni ynghylch anfon eu plant i ysgolion cyfrwng Cymraeg a dwyieithog, yn enwedig os nad ydynt yn siaradwyr Cymraeg.

“Bydd yr ymgyrch hon yn codi ymwybyddiaeth am addysg cyfrwng Cymraeg ac addysg ddwyieithog fel y gall rhieni wneud eu penderfyniad ar sail yr holl wybodaeth sydd ar gael ar eu cyfer.”

Datblygu sgiliau

Bydd yr ymgyrch tair blynedd yn targedu rhieni sydd ar fin cael plentyn a rhieni sydd â phlant 0-3 oed, ac un nod yn ôl y Llywodraeth yw chwalu rhai o’r rhagdybiaethau am addysg cyfrwng Cymraeg.

Yn ôl y Gweinidog Addysg, Huw Lewis, roedd hyn yn gam pellach mewn datblygu sgiliau Cymraeg ymysg plant.

“Nod ein hymgyrch yw chwalu rhai o’r rhagdybiaethau am addysg cyfrwng Cymraeg,” meddai Huw Lewis. “Er enghraifft nad oes modd i rieni sydd ddim yn siarad Cymraeg helpu eu plant gyda’u gwaith cartref a’u datblygiad.

“Gall addysg cyfrwng Gymraeg fod yn gyfrwng i roi sgiliau newydd i blant a gall hefyd fod yn brofiad y gallan nhw elwa’n fawr arno.”

Rhoddodd y Prif Weinidog ganmoliaeth i’r cynnydd mewn addysg cyfrwng Cymraeg yn arbennig yn ardal Caerffili, lle bu’r twf mwyaf ledled Cymru mewn addysg cyfrwng Cymraeg yn ystod y deng mlynedd diwethaf.

Awgrymodd hefyd fod yr ymgyrch yma’n ymateb i bobl yn Y Gynhadledd Fawr oedd wedi galw ar y Llywodraeth i adeiladu ar y llwyddiant hwn fel allwedd i sicrhau ffyniant yr iaith.

Cafodd Carwyn Jones ei feirniadu’n hallt gan Aelodau Cynulliad Plaid Cymru yn ogystal â Chymdeithas yr Iaith  yr wythnos diwethaf am beidio â gwneud digon dros y Gymraeg ers cynnal Y Gynhadledd Fawr nôl ym mis Gorffennaf.

‘Gall toriadau arfaethedig danseilio’r fenter’

Dywedodd Josh Parry, is-gadeirydd ymgyrch addysg Cymdeithas yr Iaith:  “Er bod y newyddion hyn yn galonogol, gallai’r toriadau arfaethedig i’r ddarpariaeth feithrin yn Rhondda Cynon Taf a Phen-y-bont danseilio’r fenter hon.

“Os nad yw’r system drochi gynnar yn parhau yn y siroedd hyn a llefydd eraill, bydd llai o blant yn cael etifeddu iaith unigryw Cymru a chael byw yn y Gymraeg felly.

“Hefyd, mae angen i’r Llywodraeth weithredu ar argymhellion ei hadolygiad ei hun o’r system addysg ail iaith, argymhellion sydd, yng ngeiriau’r adroddiad, yn fater o frys. Yn wir, mae angen addysg Gymraeg i bob disgybl yn ein gwlad.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer