BBC yn lansio trafodaeth ar ddyfodol Radio Cymru

Diweddarwyd am  


Rhodri Talfan Davies
Mae pennaeth BBC Cymru wedi dweud fod yn rhaid i Radio Cymru apelio at fwy na siaradwyr Cymraeg pybyr os yw’r orsaf am ffynnu.

Mewn araith yn yr Ŵyl Cyfryngau Celtaidd yn Abertawe dywedodd Rhodri Talfan Davies fod angen i Radio Cymru adlewyrchu bywyd Cymru fel y mae – “nid fel yr hoffem iddo fod, neu sut ry’n ni’n dychmygu yr arferai fod.”

Cyhoeddodd fod yr orsaf yn lansio “sgwrs” genedlaethol ar ddyfodol Radio Cymru, gan wahodd gwrandawyr a sefydliadau  i rannu eu barn ar yr orsaf a’i dyfodol.

Cymru’n newid

Ychwanegodd mai prif flaenoriaeth yr orsaf yw gwasanaethu ei chynulleidfa, nid achub iaith, a bod canlyniadau’r Cyfrifiad yn dangos fod y Gymru Gymraeg yn newid a bod angen i Radio Cymru adlewyrchu cynulleidfa sydd ddim yn byw trwy’r Gymraeg yn unig.

“Nid iaith yn unig ddylai ddiffinio ein gwasanaethau ond ychydig yn fwy o realiti byd blêr, dwyieithog ein cynulleidfaoedd,” meddai Rhodri Talfan Davies.

Arolwg o gynulleidfa Radio Cymru

Dywedodd Rhodri Talfan Davies nad yw’n credu mai troi Radio Cymru’n ddwyieithog yw’r ateb, ond bod angen i’r orsaf “weithio’n galetach i gyrraedd y rhai sy’n llai hyderus yn yr iaith – neu sy’n dal i’w dysgu.”

Dywedodd fod angen i’r orsaf ystyried pa fath o gerddoriaeth mae’n ei chwarae, er mwyn adlewyrchu’r amrywiaeth o gerddoriaeth mae siaradwyr Cymraeg yn gwrando arni.

“Ry’n ni’n mynd i wrando’n astud ar yr atebion wrth i ni lunio ein cynlluniau ar gyfer yr orsaf,” meddai am arolwg Radio Cymru.

Bydd Sgwrs Radio Cymru yn para am ddau i dri mis, a bydd BBC Cymru yn casglu’r ymatebion ac yn cyhoeddi eu cynlluniau am ddyfodol i Radio Cymru yn yr Hydref.

Pedwar cwestiwn

Mae BBC Cymru yn cynnig bod ymatebwyr yn rhoi eu barn ar bedwar cwestiwn:

A yw BBC Radio Cymru’n taro’r cydbwysedd cywir rhwng ei rhaglenni newyddion ac adloniant?

A yw cerddoriaeth Radio Cymru yn taro’r cywair iawn gyda chi a’ch teulu?

Gan edrych i’r dyfodol, a ydych chi’n cytuno y dylai Radio Cymru ehangu ei apêl, gan gynnwys y rheiny sy’n llai hyderus yn y Gymraeg?

Os ydych chi’n cytuno, sut dylai Radio Cymru newid neu addasu ei rhaglenni i wneud i’r cynulleidfaoedd newydd hyn deimlo bod croeso iddyn nhw a’u bod nhw’n cael eu cynnwys?

Mae’n bosib ymateb drwy e-bostio sgwrsradiocymru@bbc.co.uk, ffonio llinell arbennig Sgwrs Radio Cymru ar 03703 33 16 36, neu drwy ysgrifennu at Sgwrs Radio Cymru, Ystafell 3020, BBC Cymru Wales, Llandaf, Caerdydd, CF5 2YQ.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones