Lansio cynllun i gryfhau gofal iechyd trwy’r Gymraeg

Diweddarwyd am  


Lesley Griffiths
Mae Llywodraeth Cymru wedi lansio strategaeth er mwyn cwrdd ag anghenion siaradwyr Cymraeg ym maes iechyd.

Mae’r Gweinidog Iechyd Lesley Griffiths a’r Dirprwy Weinidog Gwasanaethau Cymdeithasol, Gwenda Thomas, yn ymweld ag Ysbyty Cwm Cynon, Aberpennar heddiw i lansio’r strategaeth sy’n anelu at wella profiad pobol o dderbyn gofal iechyd rheng flaen trwy gyfrwng y Gymraeg.

“Dim ond trwy gyfrwng y Gymraeg y gall llawer o siaradwyr Cymraeg fynegi eu hanghenion gofal yn effeithiol,” meddai Gwenda Thomas.

“Er enghraifft, yn aml bydd pobl sy’n dioddef o ddementia a phobl â strôc yn colli gafael ar eu hail iaith. Ac yn aml bydd plant o dan bump oed ond yn gallu siarad yn eu mamiaith.

“Nod y fframwaith yw gwella ansawdd y gofal drwy sicrhau bod y rhai sy’n darparu gwasanaethau yn cydnabod mai eu cyfrifoldeb nhw yw ymateb i anghenion neu ddymuniad pobl i dderbyn gofal drwy gyfrwng y Gymraeg.”

‘Cam pwysig i wella lles emosiynol’

Dywedodd Lesley Griffiths, fod y llywodraeth am “wneud yn siŵr fod defnyddwyr a’u teuluoedd yn teimlo y gallan nhw ddefnyddio’r Gymraeg wrth gael eu hasesu ac wrth dderbyn triniaeth neu ofal.”

“Mae pawb yn teimlo’n hapusach i drafod eu hiechyd personol a materion emosiynol yn eu mamiaith.

“Mae’r fframwaith hwn yn gam pwysig a fydd yn gwella nid yn unig les corfforol a meddyliol siaradwyr Cymraeg sydd angen gwasanaethau iechyd a gofal, ond hefyd eu lles emosiynol,” meddai Gweinidog Iechyd Cymru.

Comisiynydd y Gymraeg am gadw ‘llygad barcud’ ar y strategaeth

Wrth ymateb i gyhoeddi’r fframwaith strategol heddiw, dywedodd Comisiynydd y Gymraeg, Meri Huws mai “nid mater o ddewis neu ddymuniad yw gwasanaeth Cymraeg yn y maes iechyd a gofal, ond gwir angen sy’n ganolog i driniaeth glinigol.”

“Rwy’n croesawu’r ffaith bod Llywodraeth Cymru’n cydnabod yr angen hwn, ac yn ymrwymo i ddatblygu’r gwasanaethau Cymraeg trwy gyfrwng y fframwaith strategol hon,” meddai Meri Huws.

“Mae ‘Mwy na geiriau’ yn gosod her i’r gwasanaethau a’r ymarferwyr iechyd a gofal. Bydd gan y Llywodraeth rôl bwysig i’w chwarae wrth sicrhau bod yr egwyddorion a’r ymrwymiadau yn cael eu gweithredu, a byddaf fi fel Comisiynydd yn cadw llygad barcud ar y ffordd y bydd y Llywodraeth yn monitro cynnydd yn erbyn y targedau.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed