Enwi dyn fu farw ar Ffordd Blaenau’r Cymoedd ar Ddydd Nadolig

Mae dyn fu farw mewn gwrthdrawiad ar Ffordd Blaenau’r Cymoedd ar Ddydd Nadolig wedi cael ei enwi.

Bu farw Darran Peter Fellowes, oedd yn 48 oed ac yn dod o Sgiwen, yn dilyn gwrthdrawiad rhwng Toyota Aygo du a VW Beetle coch am oddeutu 5 o’r gloch ar Ddydd Nadolig.

Mae’n gadael ei fam Alma, ei fam-yng-nghyfraith Marilyn, ei lys-chwaer Jacqueline, ei wraig Donna a’u meibion Thomas a Jack.

Mae’r heddlu’n awyddus i glywed sut roedd y Toyota Aygo yn cael ei yrru cyn y gwrthdrawiad.

Teyrnged

“Fe fu Donna a Darran yn gwpwl er pan oedden nhw’n 19 oed, ac maen nhw wedi byw yn ardal Llansawel a Sgiwen erioed,” meddai’r teulu mewn datganiad.

“Roedd Darran yn ddyn teulu cariadus ac yn rhan o deulu agos.

“Byddai wrth ei fodd gyda’i ddau fab, pa un a oedd yn eu gwylio nhw’n chwarae rygbi neu’n eu helpu i drwsio un o’u cerbydau.

“Roedd Darran wedi’i gyflogi fel rheolwr cynnal a chadw gyda Premier Forecourts and Construction Ltd.

“Drwy gydol yr wythnos, byddai’n aml yn gweithio o amgylch y wlad fel rheolwr cynnal a chadw gyda Premier Forecourts and Construction Ltd.

“Drwy gydol yr wythnos, fe fyddai’n aml yn gweithio o amgylch y wlad mewn amryw o leoliadau cyn mynd adref a threulio amser gyda’i deulu yr oedd yn ei garu.

“Roedd Darran wrth ei fodd gyda DIY a saernïaeth a helpu ei feibion i drwsio’u ceir.

“Roedd e’n byw bywyd i’r eithaf ac fe fydd ei deulu, ei ffrindiau a’i gydweithwyr yn gweld ei eisiau’n fawr iawn.”