Guto Harri: “Fyddwn i ddim yn derbyn swydd yn rhif 10 gyda Boris Johnson”

Diweddarwyd am  

Guto Harri

Llun: Plimbs CC 4.0 trwy Commons Wikimedia

Dywed y newyddiadurwr Guto Harri – fu’n gweithio i Boris Johnson am bedair blynedd – na fyddai wedi derbyn swydd gyda fe yn Rhif 10 pe bai wedi cael cynnig.

Yn ôl Guto Harri, fu’n gweithio fel cyfarwyddwr cyfathrebu i Boris Johnson rhwng Mai 2008 a Mai 2012 pan oedd hwnnw yn faer ar Lundain: “Bydde genai ddim unrhyw ddiddordeb o gwbl gweithio i unrhyw lywodraeth sy’n trio arwain Prydain allan o’r Undeb Ewropeaidd heb gytundeb.”

“Ond pan oeddwn i’n gweithio i Boris, roeddwn i’n ymwybodol fod unrhyw awdurdod oedd gena i yn tarddu o’r mandate etholiadol oedd ganddo fe. Ac roeddwn i’n ymwybodol iawn fod yn rhaid imi fod yn gynrychiolydd teilwng ohono fe.”

Yn gyn-brif ohebydd gwleidyddol gyda’r BBC ac yn gyn-fyfyriwr yng Ngholeg y Frenhines, Rhydychen tra roedd Boris Johnson yn fyfyriwr yng Ngholeg Balliol, Rhydychen, gadawodd Guto Harri ei swydd gyda Boris Johnson i fynd i weithio i Rupert Murdoch. Mae wedi gweithio mewn sawl swydd yn y byd cyfathrebu ers hynny ac ef yw cyflwynydd rhaglen Y Byd Yn Ei Le ar S4C.

Mewn cyfweliad blaenorol gyda golwg360, dywedodd Guto Harri, a anwyd yng Nghaerdydd: “Roedd Boris, pan oeddwn i’n gweithio iddo fe, yn un o’r bobol fwyaf eangfrydig, pro-Ewropeaidd a goddefgar allwn i ei ddychmygu mewn gwleidyddiaeth – yn enwedig, efallai, gwleidyddiaeth geidwadol.

“Roedd e’n gymaint o sioc i mi ag oedd e i’w frodyr, ei chwiorydd a’i dad pan ddywedodd ei fod am adael yr Undeb Ewropeaidd. Roedd e’n sioc ryfeddol.”

Cummings “ddim yn gynrychiolydd teilwng”

Nid yw Guto Harri yn credu fod Dominic Cummings yn gynrychiolydd teilwng o’r Prif Weinidog yn San Steffan.

Dywed: “Dw i’n credu pan fod Dominic Cummings yn swagro o gwmpas San Steffan gyda gwydred o win yn ei law yn rhegi wrth bobl, yn esgus nad yw’n gwybod pwy yw pobl fel Kenneth Clarke ac yn diswyddo cynghorwyr teyrngar a gweithgar mewn modd mor ddramatig, dyw e ddim yn gynrychiolydd teilwng o’r dyn oeddwn i’n arfer gweithio iddo fe.”

Cyfres newydd

Dechreuodd cyfres newydd o Y Byd Yn Ei Le neithiwr (Medi 10) a bu Guto Harri yn holi Kenneth Clarke, y cyn-ganghellor, AS Ceredigion Ben Lake a David Davies, AS Mynwy.

Dywedodd Kenneth Clarke ar y rhaglen y byddai yn fodlon dod yn brif weinidog dros dro mewn llywodraeth o undod cenedlaethol er mwyn datrys Brexit.

Wrth annog pawb i wylio’r gyfres newydd, meddai Guto Harri: “Mae’n gyfnod eithriadol o gyffrous, mae holl reolau’r gêm wleidyddol wedi chwalu’r rhacs a fedrwn ni ddim cymryd dim byd yn ganiataol bellach.

“Felly mae cael y cyfle i fod ar yr awyr gyda gwleidyddion Cymreig a hefyd rhai o enwau mawr y byd gwleidyddol Prydeinig yn gyfle gwych.”
Mae Y Byd Yn Ei Le yn cael ei ddarlledu bob nos Fawrth am 9.30yh ar S4C.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer