Cyrchoedd Syria – Theresa May yn wynebu cwestiynau caled

Diweddarwyd  
Llun pen ac ystwydd o Theresa May

Theresa May

Llun: Anika Haas trwy Commons Wikimedia CC2.0

Fe fydd y Prif Weinidog, Theresa May, yn wynebu Aelodau Seneddol heddiw, a hynny am y tro cyntaf ers y cyrchoedd milwrol yn Syria.

Mae disgwyl y bydd y Prif Weinidog yn wynebu cwestiynau caled yn Nhŷ’r Cyffredin gyda rhai ASau’n amau a oedd y cyrchoedd yn gyfreithiol ac eraill yn flin am na chafodd Tŷ’r Cyffredin bleidleisio ar y mater ymlaen llaw.

Fe fydd y Prif Weinidog yn amddiffyn ei phenderfyniad, gan fynnu bod y cyrchoedd o “fudd cenedlaethol” er mwyn ceisio atal defnydd o arfau cemegol, gan gynnwys ymosodiadau yn y Deyrnas Unedig – cyfeiriad ar y gwenwyno yn Salisbury, neu Gaersallog.

‘Rhaid rhwystro arfau cemegol’

“Gadewch i mi fod yn hollol glir,” meddai Theresa May ymlaen llaw. “R’yn ni wedi gweithredu oherwydd ei fod o fudd cenedlaethol i ni wneud hynny.

“Mae o fudd cenedlaethol i ni rwystro defnydd pellach o arfau cemegol yn Syria – ac i gadw ac amddiffyn y consensws rhyngwladol na ddylai’r arfau hyn gael eu defnyddio.

“Allwn ni ddim gadael i’r defnydd o arfau cemegol gael ei normaleiddio – yn Syria, ar strydoedd y Deyrnas Unedig, neu unman arall.”

Fe fydd y Prif Weinidog hefyd yn gofyn am ddadl frys yn Nhŷ’r Cyffredin er mwyn trafod y mater, ond dyw hi ddim yn cynnig pleidlais.

Gwrthwynebu

Fe ymunodd y Deyrnas Unedig â’r Unol Daleithiau a Ffrainc ddydd Gwener er mwyn cynnal cyrchoedd awyr ar rai o ganolfannau arfau cemegol Syria, yn dilyn yr ymosodiad ar Douma wythnos yn ôl.

Dywedodd ar y pryd fod y cyrchoedd yn “gyfreithlon”, ac amddiffynnodd ei phenderfyniad i fwrw ymlaen heb sêl bendith y Senedd ac fe ddywedodd Arylywdd Ffrainc, Emmanuel Macron, mai ef oedd wedi gwthio’r Unol Daleithiau i weithredu.

Ond mae arweinydd y gwrthblaid, Jeremy Corbyn, wedi dweud bod angen cyflwyno deddf newydd a fydd yn ei wneud yn orfodol i’r Llywodraeth gael caniatâd Tŷ’r Cyffredin cyn gweithredu ar faterion milwrol.

Wrth godi cwestiynau am gyfreithlondeb y cyrchoedd, fe ddywedodd fod y cemegyn perthnasol, clorîn, yn cael ei ddefnyddio gan “nifer o’r rhai sy’n rhan o’r gwrthdaro” yn Syria.

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd