Gleision 33–14 Lyon
Gorffennodd y Gleision eu hymgyrch yng Nghwpan Pencampwyr Ewrop gyda buddugoliaeth bwynt bonws yn erbyn Lyon ar Barc yr Arfau brynhawn Sadawrn.
Roedd gobeithion y ddau dîm o gyrraedd yr wyth olaf ar ben cyn y gic gyntaf ond gorffennodd y Gleision grŵp 3 mewn steil gyda buddugoliaeth gyfforddus yn erbyn y Ffrancwyr.
Cais cosb i Lyon a oedd sgôr cyntaf y gêm ond roedd y Gleision yn gyfartal ychydig dros hanner ffordd trwy’r hanner diolch i gais Aled Summerhill, yr asgellwr yn croesi wedi bylchiad gwreiddiol Harri Millard.
Cyfunodd yr un chwaraewyr am ail gais y tîm cartref ddeg munud yn ddiweddarach, y canolwr yn creu i’r asgellwr unwaith eto.
Yr ymwelwyr a oedd ar y blaen ar yr egwyl serch hynny diolch i gais Xavier Mignot, Jarrod Evans yn methu a chanfod yr ystlys gyda chic amddiffynnol a Toby Arnold a Mignot yn gwrthymosod yn effeithiol, 12-14 y sgôr wrth droi.
Dechreuodd y Gleision yr ail hanner ar dân gan adennill y fantais gyda chais Owen Lane wedi dwylo da Tomos Williams.
Williams ei hun a sgoriodd bedwerydd y Cymry, yn sicrhau’r pwynt bonws wedi dadlwythiad destlus Josh Navidi.
Ac roedd y fuddugoliaeth yn ddiogel ar yr awr, Lewis Jones yn sgorio wedi cic letraws daclus Gareth Anscombe i Summerhill.
33-14 y sgôr terfynol felly a’r Gleision yn gorffen yn drydydd yng ngrŵp 3, y tu ôl i’r Saracens a Glasgow.
.
Gleision
Ceisiau: Aled Summerhill 22’, 32’, Owen Lane 43’, Williams 54’, Lewis Jones 60’
Trosiadau: Gareth Anscombe 23’, 44’, 55’, 61’
.
Lyon
Ceisiau: Cais Cosb 15’, Xavier Mignot 37’
Trosiadau: Alexis Palisson 38’
