‘Fi’n despret i chwarae i Gymru’ – Emyr Huws

Diweddarwyd am  
Emyr Huws

Emyr Huws

Llun: S4C

Mae’r chwaraewr canol cae Emyr Huws yn dweud ei fod e’n “despret” i wisgo crys coch Cymru unwaith eto.

Dyw’r Cymro Cymraeg o Lanelli sy’n chwarae i glwb Ipswich ddim wedi chwarae i’r tîm cenedlaethol ers iddo gael ei anafu yn niwedd 2017.

Er yr holl anafiadau dros y blynyddoedd diwethaf, mae’n dweud ei fod e’n aros yn “bositif”.

“Fi wedi delio efo anafiadau trwy fy ngyrfa,” meddai mewn cyfweliad â rhaglen Sgorio ar S4C a gafodd ei ddarlledu neithiwr.

“I fod yn onest, fi wedi cael fy fair share.

“ Fi’n gwybod sut i ddelio gyda nhw, sut i gadw’n bositif.”

Ar ôl cael sawl llawdriniaeth yn 2017 a 2018, fe gafodd ei gyfnod o ymadfer ond aeth pethau o ddrwg i waeth.

“Nes i drial dod nôl, oedd bach o complications efo’r pen-glin yn chwyddo lan.

“Roedd e’n amser caled i fi ddod trwyddo i fod yn onest.”

Colli’r Ewros

Hyd yn oed mor bell yn ôl â 2016, roedd gan Emyr Huws gyfres o anafiadau, ac fe gollodd ei gyfle i gael ei ystyried yng ngharfan Chris Coleman ar gyfer Ewro 2016.

“Ar y cyfnod yna, ro’n i’n delio gydag anaf ar fy mhigwrn,” meddai.

“Ro’n i wedi dechrau chwarae a bod yn rhan o’r gemau qualification Ewro 2016.

“Wedyn ges i’r anaf a daeth pobol eraill i mewn a gwneud yn dda, so o’n i wedi colli fy safle.”

Wedi troi cornel?

Ond ar ôl dychwelyd yn gryfach a chael dechrau da i’r tymor gydag Ipswich, a chael canmoliaeth am ei berfformiadau’n ddiweddar, mae Emyr Huws wedi troi ei olygon tuag at garfan Cymru Ryan Giggs.

“Fi’n desperate i chwarae i Gymru a rhoi’r crys coch nôl arno a bod yn rhan o’r garfan. Ma fe’n meddwl lot iawn i fi.

“Ond mae’n rhaid i mi ffocysu ar be sy’n digwydd efo Ipswich, a chwarae’n gyson a gobeithio fod pethau’n cwympo mewn i’w lle yn y dyfodol.

Yn amlwg, bydden i’n hoffi cael y call up, ac os bydda i’n cael y siawns, bydda i’n cymryd e gyda dwy law.

“Ond dwi ddim gyda unrhyw expectations.

“Mae’n rhaid i mi gael tymor solid ble dw i wedi chwarae gemau da yn gyson, i ddangos i bawb bod Emyr yn ôl, a bod yr anaf yn y past, old news, a bod hwn yn ddechreuad newydd.”

Fe fydd Cymru’n chwarae mewn gemau cyfeillgar yn erbyn Awstria a’r Unol Daleithiau fis nesaf wrth baratoi ar gyfer Ewro 2020.

Brwydro i gadw Neco Williams

Yn y cyfamser, fe fydd Cymru’n gorfod brwydro â Lloegr i ddenu Neco Williams i’r garfan.

Ac yntau wedi’i eni yn Wrecsam, mae amddiffynnwr Lerpwl yn gymwys i chwarae dros y ddwy wlad, ond mae e eisoes wedi cynrychioli tîm dan 19 Cymru.

Mae e wedi chwarae pedair gwaith i Lerpwl y tymor hwn, ac roedd e’n aelod o’r garfan enillodd Cwpan y Byd Clybiau FIFA fis Rhagfyr.

Mae lle i gredu erbyn hyn bod Lloegr yn cadw llygad barcud ar ei ddatblygiad.

“Rydych chi bob amser yn poeni pan fo gwledydd mawr yn dod i mewn a bod yna wahanol ffactorau, a sŵn o’r tu allan,” meddai Ryan Giggs wrth y BBC.

“Ond mae Neco wedi dod trwy system Cymru. Dydy hynny ddim bob amser yn digwydd ond yn ddelfrydol, rydych chi eisiau iddo fe ddigwydd.

“Mae pobol fel [hyfforddwyr Cymru] Paul Bodin, Rob Edwards, Rob Page wedi mwynhau gweithio gyda fe ac mae e wrth ei bodd yn chwarae dros Gymru.

“Felly bydd rhaid i ni aros tan fis Mawrth.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn