Un arall o sêr ifanc Lloegr ar ei ffordd i’r Liberty

Diweddarwyd am  
Stadiwm Liberty

Stadiwm Liberty

Llun: Christopher Elkins CC 2.0 trwy Wikimedia Commons

Mae un arall o sêr tîm dan 17 Lloegr wedi ymuno ar fenthyg â Chlwb Pêl-droed Abertawe am weddill y tymor.

Conor Gallagher yw’r trydydd aelod o’r tîm i symud i Abertawe, yn dilyn trosglwyddiadau dros dro’r ymosodwr Rhian Brewster o Lerpwl a’r amddiffynnwr Marc Guehi o Chelsea. 

Mae’r triawd i gyd yn gyfarwydd â Steve Cooper a’i gynorthwywyr ar ôl iddo fod yng ngofal y tîm dan 17 a gododd Gwpan y Byd yn 2017.

Gall y chwaraewr canol cae 19 oed chwarae ar yr asgell hefyd, ac fe sgoriodd e chwe gôl a chynorthwyo dwy gôl arall mewn 26 gêm yn ystod cyfnod ar fenthyg yn Charlton.

Cafodd ei enwi’n Chwaraewr Ifanc y Mis yn y Bencampwriaeth ym mis Medi ac mae’n gyn-aelod o dîm dan 18 Chelsea oedd wedi ennill pedwar tlws mewn un tymor.

Mae ganddo fe gytundeb gyda Chelsea tan haf 2021, a chafodd ei enwi’n Chwaraewr Gorau’r Academi yn 2018-19.

Roedd e’n aelod o garfan Chelsea oedd wedi ennill Cwpan Europa wrth guro Arsenal fis Mai y llynedd, ac fe enillodd ei gap dan 21 cyntaf ym mis Hydref, gan fynd yn ei flaen i sgorio un gôl mewn pedair gêm.

Fe allai gael ei gynnwys yng ngharfan yr Elyrch i herio Wigan ddydd Sadwrn (Ionawr 18).

‘Bwrw iddi’

Mae Conor Gallagher yn dweud ei fod e’n edrych ymlaen at “fwrw iddi” gyda’r Elyrch.

“Dw i wedi cyffroi’n lân o gael ymuno â chlwb mawr fel Abertawe,” meddai.

“Dw i’n edrych ymlaen at fwrw iddi a chyfrannu at y tîm.

“Dw i wedi magu tipyn o brofiad yn ystod fy nghyfnod gyda Charlton, a chwarae bron bob munud yn y Bencampwriaeth.

“Roedd fy nghyfnod i gyd yno’n wych, ac mae’r her newydd hon yn un i gyffroi yn ei chylch.

“Dw i’n credu bod yna gryn ddisgwyliadau oherwydd ’mod i wedi sgorio nifer o goliau a dw i’n hoffi rhywfaint o bwysau, a dw i’n edrych ymlaen at ddangos beth dw i’n gallu’i wneud.”

Targedau yn Abertawe

Mae’n dweud ei fod e’n edrych ymlaen at y frwydr am le yn y gemau ail gyfle ar ddiwedd y tymor.

“Dw i eisiau helpu Abertawe i gyrraedd y gemau ail gyfle oherwydd dw i’n sicr yn credu ein bod ni’n gallu gwneud hynny.

“Gyda’r garfan hon, os cawn ni rediad da o gemau, gallen ni hyd yn oed fynd am ddyrchafiad awtomatig oherwydd dw i ddim yn meddwl y dylech chi fod yn wfftio unrhyw beth.

“Ond ar lefel bersonol, un gêm ar y tro fydd hi, cymryd popeth fel mae’n dod a cheisio ennill pob gêm.”

Pêl-droed

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd